Table of Contents
Сè повеќе луѓе се соочуваат со здравствени проблеми со дебелото црево и варењето, а следниве совети од експерти можат да ви помогнат да го решите тој проблем
Проблемите со варењето – подувањето, констипацијата или чувството на тежина по јадење – мачат голем број луѓе. Иако аптеките нудат бројни препарати, гастроентеролозите неретко препорачуваат природни решенија кои даваат брзи и долгорочни резултати, а лесно можете да ги приготвите дома.
Издвојуваме четири напивки што експертите ги сметаат за најефикасни во прочистувањето и зајакнувањето на цревата.
Сок од суви сливи – природен сојузник против констипација
Сокот од суви сливи е најстариот и најпознатиот природен лек против констипација. Тој е богат со влакна и сорбитол, природен шеќерен алкохол кој влече вода во цревата и го олеснува празнењето.
Како се пие: една чаша наутро, најдобро на празен стомак.
Пробиотски напивки – за рамнотежа на цревната флора
Кефирот, јогуртот и комбухата не се само тренд. Пробиотиците ги обновуваат добрите бактерии во цревата и директно влијаат врз имунитетот, варењето, дури и расположението.
Како се пие: една чаша дневно, со оброк или наутро.
Поврзани објави
Ленено семе во вода – влакна што им помагаат на цревата
Ленот е познат како прочистувач на цревата. Кога ќе се потопи во вода, ослободува желатинска маса која го олеснува празнењето. Освен за варење, ленот е корисен и за намалување на холестеролот и за регулација на шеќерот во крвта.
Како се пие: една лажица мелен лен во чаша вода, оставете го да отстои еден-два часа и испијте го навечер или наутро.
Чај од ѓумбир – го смирува стомакот и го забрзува варењето
Ѓумбирот од дамнешни времиња е познат како лек за стомакот. Топлиот чај од ѓумбир помага за надуеност, гасови и го забрзува варењето по обилен оброк.
Како се пие: прелејте рендано парче ѓумбир со врела вода и оставете го 5-10 минути, по желба додајте и лажиче мед.
Според експертите, најдобри резултати дава комбинацијата од влакна, пробиотици и билки кои го смируваат дигестивниот тракт. Затоа, сокот од суви сливи, кефир, лен и чај од ѓумбир се најдобриот природен избор за здравјето на цревата.
Но важно е да се нагласи дека умереноста е клучна. Дури и природните напивки, ако се користат во преголеми количества, може да предизвикаат спротивни ефекти. А доколку проблемите траат подолго, лекарите советуваат задолжителна посета на гастроентеролог.
ФОТО: julien Tromeur / Unsplash
