Table of Contents
Ози Озборн, легендарниот фронтмен на Black Sabbath и икона на хеви-металот, почина на 76 години
Ози Озборн, легендарниот фронтмен на бендот Black Sabbath, човекот чиј глас и енергија го обликуваа хеви-металот и засекогаш го променија лицето на рок музиката, почина на 76-годишна возраст. Неговото семејство ја соопшти тажната вест:
„Со тага што не може да се опише со зборови, ве известуваме дека нашиот сакам Ози Озборн почина утринава. Беше опкружен со семејството и со љубов.“
Роден во Бирмингем во 1949 година, Ози заедно со Тони Ајоми, Гир Бејтер и Бил Ворд го основале Black Sabbath – бендот што ги постави темелите на она што денес го викаме хеви метал. Песните како Paraonid, Iron Man, War Pigs и Children of the Grave, станаа химни на цели генерации бунтовни души ширум светот.
По напуштањето на бендот во 1979 година, Ози започна соло-кариера која беше еднакво спектакуларна. Хитовите како Crazy Train, Mr. Crowley и No More Tears, го врежаа неговото име меѓу бесмртните икони на рокенролот.
Повеќе од музика – симбол на една култура
Ози не беше само музичар, беше феномен. Неговиот живот беше еднакво див како и фасцинантен. Лилјаци на сцена, бројни скандали, но и разголена ранливост и искреност пред камерите за МТВ серијалот The Osbornes, кој на почетокот од 2000-тите заедно со сопругата Шерон и децата ја покажа светлата и темната страна на славата.
Неговата борба со здравјето, особено последните години кога му била дијагностицирана Паркинсонова болест и кога имал низа комплицирани операции на ‘рбетниот столб, беше јавна и искрена. И покрај сè, Ози остана борец до самиот крај.
Збогување какво што му прилега на кралот
Поврзани објави
Последниот концерт во неговиот роден Бирмингем, кој се одржа пред само неколку недели на стадионот Вила Парк, беше неговиот последен поклон. На бината му се придружија Metallica и Guns N’Roses, а Ози на публиката ѝ кажа:
„Немате поим како се чувствувам – ви благодарам од срце.“
Публиката знаеше – ова не е само концерт, туку крај на една епоха.
Признание и вечна слава
Ози Озборн е двократен член на Рокенрол куќата на славните – и како дел од Black Sabbath и како соло-уметник. Добитник е на повеќе „греми“ награди, почесна награда за животно дело, како и ѕвезда на холивудската патека на славните. Сепак, најголемото признание е она што му го даде народот – статусот на легенда.
Тишина по бучавата
Зад себе ја остави сопругата Шерон, со која помина повеќе од четири децении, и пет деца. Зад контроверзната и понекогаш застрашувачка маска, се криеше човек со длабока емпатија, духовитост и лојалност кон семејството.
Ози Озборн си замина – но звукот што го создаде никогаш нема да стивне. Во свет кој се менува, тој остана константа за бунтот, искреноста и автентичната уметност.
ФОТО: Инстаграм
