Прагот за електраните на домаќинствата или потрошувачите-производители ќе биде покачен на 10 kW, а времето потребно за добивање дозволи за инсталација на кровни фотоволтаици ќе биде скратено. Ова значително ќе ја олесни постапката за поставување на соларни панели на домовите.
Прв пат во законската регулатива се предлага воведување на законски рок за административната постапка за издавање дозволи за поставување кровни фотоволтаици за потрошувач – производител. Ова е важен чекор кон поедноставување на процедурите и забрзување на енергетската транзиција.
Ова е предвидено во измените и дополнувањата на Законот за енергетска ефикасност што Министерството за енергетика, рударство и минерални суровини (МЕРМС) ги објави на ener.gov.mk. Според информациите од Министерството, рокот од еден месец ќе важи за издавање дозволи за поставување соларна опрема со капацитет до 100 kW, како и за потрошувачи-производители на обновлива енергија и за заедници на обновлива енергија.
Со овие измени, потрошувачите-производители добиваат повисоки граници за своите електрани: за домаќинствата, лимитот е до 10 kW, а за компаниите – 70 kW. “Со предлог измените се поедноставува и постапка за приклучување на електродистрибутивната мрежа на потрошувач-производител кој користи ОИЕ,” се наведува во соопштението.
Во случај анализата на условите за приклучување да покаже дека приклучувањето на предложената локација е невозможно, операторот на електродистрибутивниот систем е обврзан во рок од 15 дена писмено да го извести барателот и да предложи алтернативна точка за приклучување, поради технички, безбедносни или причини за некомпатибилност на компонентите на системот. Операторот на електродистрибутивниот систем е должен да го приклучи енергетскиот објект на мрежата во рок од еден месец од официјалното потврдување на комплетноста на потребната документација.
“Доколку операторот на електродистрибутивниот систем не се произнесе во рокот од мрежните правила се смета дека согласноста за приклучување е дадена,” наведуваат од МЕРМС. Според Министерството, ова законско решение претставува значаен чекор кон енергетска независност и интеграција на обновливите извори на енергија, намалување на потрошувачката на енергија и емисиите на штетни гасови, и е во согласност со ЕУ стандардите.
“Пакетот мерки истовремено ја јакне енергетската ефикасност и создава стабилна рамка за обновливите извори на енергија со директни економски и еколошки придобивки за граѓаните и бизнисите.” Според МЕРМС, документот е изработен по принципот енергетска ефикасност на прво место и отвора јасен и практичен пат за побрза транзиција до почиста животна средина без да се загрози стабилноста на системот.
Министерството исто така предлага 20-годишна стратегија за реновирање на станбени, јавни и комерцијални згради со енергетски ефикасни решенија. Владата, на предлог на МЕРМС, ќе донесе долгорочна стратегија за реконструкција на објектите, со цел да ги претвори во високо енергетски ефикасни со речиси нулта потрошувачка, со можност за широка интеграција на обновливи извори на енергија како што се соларните системи.
“Со имплеметација на ОИЕ ќе се намалуваат стакленичките гасови и се штити животната средина и се постигнува и климатската неутралност.” Се предвидува тројно зголемување на заштедата во јавниот сектор, преку реконструкција на згради кои се користат во јавниот сектор, при што годишната заштеда на енергија се зголемува од 1% на 3%.
Инсталацијата на соларни колектори за топла вода во новите јавни објекти или при значајна реконструкција на објекти станува задолжителна, доколку е технички и економски изводливо.
МЕРМС воспоставува и финансиски механизми, јавни повици и едношалтерски систем за поддршка на проекти за енергетска ефикасност и ОИЕ, овозможувајќи инвестиции во соларни панели, геотермални системи и паметни технологии, како механизми за постигнување на целите на Стратегијата за реконструкција. “Јавниот сектор се обврзува да набавува производи, возила и згради со највисоки енергетски и еколошки стандарди, вклучувајќи сертификати за енергетски карактеристики, промовирајќи технологии со низок јаглероден отпечаток.”
Измените исто така креираат можност за меѓуопштинска соработка за локален развој во општини со помалку од 15,000 жители, кои можат да формираат заеднички тела за програми за енергетска ефикасност и со усвојување на програма за енергетска ефикасност ќе добијат пристап и до Фондот за енергетска ефикасност, наведува Министерството за енергетика, рударство и минерални суровини.
