Пензионерите на почетокот на септември ќе дознаат колку точно ќе изнесува нивното ново примање. Иако пресметките се при крај, конечниот процент на усогласување сè уште не е утврден, бидејќи се очекуваат последните податоци за движењето на економските показатели во август.
Според досегашните проценки на Министерството за социјална политика, демографија и млади, пензиите би можеле да се зголемат за околу 3 до 3,5 проценти. Конечната бројка треба да биде соопштена откако ќе заврши август и ќе бидат комплетирани сите потребни статистички параметри.
Овојпат растот ќе биде различен од претходните линеарни покачувања. Наместо сите пензионери да добијат ист фиксен износ, усогласувањето ќе се пресметува процентуално, што значи дека повисоката пензија ќе донесе и поголем номинален износ на зголемување.
Септемвриската пензија, со новото усогласување, треба да биде исплатена на почетокот на октомври. Министерот Ѓоко Велковски најави дека конкретните бројки ќе бидат објавени веднаш по завршувањето на пресметките.
Со тоа се враќа редовниот модел на процентуално усогласување на пензиите, по периодот во кој беа применувани линеарни зголемувања. Според најавите, следното законско усогласување е предвидено за март 2027 година.
