Светските цени на храната продолжија да растат и во јули, достигнувајќи го највисокото ниво од почетокот на 2023 година, покажуваат најновите податоци на Организацијата за храна и земјоделство на Обединетите нации (ФАО). Новото зголемување е предводено од поскапувањето на житарките, растителните масла и шеќерот, што повторно ги засили стравувањата од дополнителен притисок врз глобалните трошоци за храна.
Според индексот на ФАО, кој ги следи цените на најважните прехранбени суровини на меѓународните пазари, во јули е регистриран раст од 0,6 проценти во споредба со претходниот месец. Индексот достигнал 131,1 поен, што е негово највисоко ниво од јануари 2023 година.
Најголем придонес за месечниот раст имале житарките. Индексот за оваа категорија се зголемил за 3,4 проценти и достигнал 113,8 поени, како резултат на повисоките цени на повеќе основни земјоделски култури на светскиот пазар.
Покрај житарките, раст е забележан и кај растителните масла и шеќерот. Од друга страна, цените на месото и млечните производи бележат намалување, што делумно го ублажило вкупниот раст на индексот.
Во услови на нестабилни глобални пазари, климатски предизвици и неизвесност во трговијата, аналитичарите предупредуваат дека движењето на цените на храната ќе остане еден од клучните економски показатели што внимателно ќе се следат во наредните месеци.
