Највкусните есенски рецепти со тиква – Убавина и здравје

Само помислете на слаткиот тиквеник или на солената пита со компир и тиква. А што да кажеме за крем-супата од тиква или веганските стапчиња од тиква? Толку голем избор на рецепти! И секој од нив е исклучително здрав, бидејќи тиквата е богата со витамини од групата Б и витамин Ц.

Затоа ги собравме, според наше мислење, највкусните есенски рецепти со тиква.

Зошто тиквата е здрава?

Тиквата е нискокалорична намирница богата со хранливи материи. Во голем процент е составена од вода, што ја прави освежувачка и лесна за варење. Содржи природни шеќери и мала количина масти, а е одличен извор на растителни влакна, кои го поттикнуваат варењето и даваат чувство на ситост.

Во тиквата се наоѓаат значајни количини бета-каротен, кој во организмот се претвора во витамин А и придонесува за здравје на кожата, видот и имунитетот. Дополнително, содржи витамин Ц, витамини од Б-комплексот, како и минерали – калиум, магнезиум и железо.

Благодарение на ваквиот состав, тиквата има антиоксидативни својства, помага во регулирањето на крвниот притисок и во зајакнување на имунитетот. А поради својот благ вкус и хранливост, идеална е за деца, постари лица и за оние кои следат посебни режими на исхрана.

Тиквеник (пита со тиква)

Состојки:

• 500 г рендана тиква

• 500 г тенки кори за пита

• 100 г шеќер

• 1 ванила шеќер

• 1 лажичка цимет

• 100 мл масло

• Шеќер во прав за посипување

Приготвување:

1. Тиквата најпрво исчистете ја од семки и изрендајте ја на крупно ренде.

2. Во поголема чинија измешајте ја ренданата тиква со шеќерот, ванила шеќерот и циметот. Оставете ја смесата кратко да отстои додека ги подготвувате корите.

3. Земете две кори, секоја премачкајте ја со масло. Распоредете неколку лажици од филот по должината на корите и внимателно свиткајте ги во ролни.

4. Ваквите ролни редете ги во намачкан плех. Повторувајте го процесот додека го искористите целиот материјал.

5. На крај, прелијте ги сите ролни со преостанатото масло и ставете ги во рерна загреана на 180°C.

6. Печете околу 30–40 минути, додека корите добијат златно-смедова и крцкава боја.

7. Откако тиквеникот малку ќе се излади, посипете го со шеќер во прав и послужете.

Крем-супа од тиква (потаж)

Состојки:

• 500 г тиква, исечена на коцки

• 1 главица кромид

• 2 чена лук

• 1 морков

• 1 компир

• 500–700 мл зеленчуков бујон или вода

• Маслиново масло

• Сол и бибер по вкус

• По желба: павлака за сервирање

Приготвување:

1. Во големо тенџере загрејте малку маслиново масло и пропржете ситно сечкан кромид и бел лук додека омекнат и ја пуштат ароматa.

2. Додајте коцки тиква, морков и компир. Кратко пропржете ги сите заедно.

3. Прелијте со бујон или вода, доволно да го покрие зеленчукот.

4. Зачинете со сол и бибер по вкус и гответе на средна температура околу 20 минути, додека зеленчукот целосно омекне.

5. Со помош на рачен блендер, изматете ја супата додека стане сосема мазна и кремаста.

6. По потреба додајте уште сол или бибер.

7. Послужете веднаш, со лажица павлака, неколку капки маслиново масло или пржени семки од тиква.

Печена тиква

Состојки:

• 1 помала тиква (Hokkaido или Butternut)

• Маслиново масло

• Сол и бибер по вкус

• По желба: розмарин, тимјан, цимет или кари

Приготвување:

1. Тиквата измијте, исчистете ја од семки и исечете на парчиња – кришки или коцки, во зависност од желбата. Кората не е потребно да се лупи ако користите хокаидо-тиква, бидејќи омекнува при печењето.

2. Распоредете ги парчињата на плех обложен со хартија за печење. Препрскајте со маслиново масло и посипете со сол, бибер и зачини по желба.

   • За солена варијанта одлични се рузмарин или тимјан.

   • За благо-слатка варијанта можете да додадете цимет или малку мед.

3. Ставете го плехот во загреана рерна на 200°C и печете околу 30–40 минути, додека тиквата стане благо запечена однадвор и сосема мека однатре.

4. Послужете ја топла, како прилог, ужина или лесна вечера.

Фото: Инстаграм