Грчкиот пемиер Киријакос Мицотакис му порача на ВМРО-ДПМНЕ дека тој и неговата Неа Демократија кога биле во опозиција не се согласувале со Договорот од Преспа, но дека сега мора да го почитуваат.
– Се надевам дека оние работи што се слушнаа предизборно, нема постизборно да бидат официјална позиција на новата Влада на Северна Македонија, бидејќи ако се случи ова, ќе имаме проблеми, истакна премиерот на Грција.
Ова Мицотакис го подвлече во интервјуто за грчката телевизија Алфа, јави дописничката на МИА од Атина. Како што тоа го направила неговата нова влада, така тоа ќе треба да го направи новата власт во Македонија која е на повидок.
Посочи дека „со загриженост“ ги следи изјавите на функционерите на ВМРО, но и дека „со голем интерес“ го чека официјалниот став на новиот премиер за да види „на кој начин ќе се осврне на името на неговата земја“.
-Сакам да бидам јасен. Јас лично не се согласував со Договорот од Преспа, а особено со одредниците „македонска нација“ и „македонски јазик“. Но, го прифатив Договорот во рамките на континуитетот на државата и препознав дека, и покрај моето несогласување со Договорот, морам да го почитувам. Истите барања постојат и сега од новото раководство на Северна Македонија. Да бидеме трпеливи. Сакам да се надевам дека оние работи што се слушнаа предизборно, нема да бидат официјална позиција на новата Влада постизборно, бидејќи ако се случи ова ќе имаме проблеми, рече Мицотакис.
