Концертот на британската поп-ѕвезда Роби Вилијамс, предвиден за 7 октомври во Истанбул, е одложен поради причини поврзани со сигурноста.
Настапот беше планиран за истиот датум како и годишнината од нападот на палестинското исламистичко движење Хамас врз Израел на 7 октомври 2023 година, што го запали конфликтот во Појасот Газа.
Организаторот на концертот објави дека истиот е одложен “во согласност со одлуката донесена од канцеларијата на гувернерот на Истанбул”, дополнувајќи дека рефундирањето на билетите ќе се реализира наскоро преку платформата каде што беа купени.
Вилијамс на својот Инстаграм профил денес напиша дека неговиот настап е одложен од градската администрација на Истанбул “во интерес на јавната безбедност”. “Многу ми е жал што нема да можам да настапам во Истанбул следната недела. Општинските власти го откажаа концертот во интерес на јавната безбедност. Последното нешто што сакам да го направам е да ја загрозам безбедноста на моите обожаватели. Нивната безбедност е на прво место,” изјави Вилијамс.
Во текот на изминатите денови, неколку невладини организации апелираа до турските власти да го откажат концертот, вклучувајќи ја и Платформата за исламска солидарност, која планираше протести под слоганот “Роби Вилијамс, ционисту, напушти ја Турција!”.
Роби Вилијамс е во брак со актерката со еврејско-американско потекло Ајда Филд. Вилијамс имаше настапи во Израел во 2015 и 2023 година. За време на концертот во јуни 2023 година, Вилијамс изјави дека тој и неговата сопруга ги воспитуваат своите деца според еврејските традиции.
Вилијамс досега не дал никакви директни изјави за терористичкиот напад врз Израел од 7 октомври 2023 година или за масовниот одговор на Израел во Газа.
