Кина официјално потврди дека ќе набави 200 патнички авиони од Boeing, со што се отвора ново поглавје во односите меѓу Пекинг и Вашингтон по долг период на застој во авионската индустрија.
Договорот беше објавен по посетата на американскиот претседател Donald Trump на Пекинг, каде со кинескиот лидер Xi Jinping се разговарало за трговијата, царините и економската соработка меѓу двете земји.
Со ова практично завршува повеќегодишниот прекин на испораките на авиони на „Боинг“ за кинескиот пазар, што беше последица на трговските тензии и политичките несогласувања меѓу двете најголеми светски економии.
Покрај договорот за авионите, двете страни најавија и нови разговори за продолжување на трговското примирје кое треба да истече во ноември. Во фокусот ќе биде и можно намалување на царините за производи вредни милијарди долари.
Од кинеското Министерство за трговија соопштија дека ќе се работи и на проширување на размената на земјоделски производи меѓу двете држави, како и на стабилизирање на глобалното снабдување со ретки земни метали, кои се клучни за технолошката и автомобилската индустрија.
Економските аналитичари оценуваат дека новите договори може да придонесат за смирување на трговските тензии и зајакнување на економската соработка меѓу Соединети Американски Држави и Кина.
