Дирекцијата за заштита на растенијата на Србија го зајакна редовниот надзор во прометот со свежо овошје и зеленчук, како и во предизвозната постапка. Целта на овие анализи е да се проверат остатоците од производите за заштита на растенијата, а досега се проверени повеќе од 450 мостри во предизвозната постапка.
Постапката со неусогласени производи е јасно дефинирана со закон и опфаќа забрана за промет и уништување на такви производи на безбеден начин – велат за „Политика“ во Министерството за земјоделство и ги предупредуваат земјоделските производители и извозници дека „секоја употреба или промет на препарати за заштита на растенијата кои се забранети, ќе се санкционира на начин пропишан со закон“.
И министерот за земјоделство, Александар Мартиновиќ, неодамна изјави дека државната стратегија предвидува подобрување на состојбата на пазарот на храна. Како што појасни, во моментов се работи на измена на два прописи – Законот за безбедност на храна и Законот за службени контроли. Предлогот е да се воведе „измама со храна“ – која за прв пат во домашното законодавство ги регулира процедурите за откривање и санкционирање на вакви случаи.
Според него, тоа е клучно бидејќи досегашните казни за вакви прекршоци биле несоодветни, а сега, како што нагласи, санкциите ќе бидат построги за сторени прекршоци. -Преку оваа подобрена координација, појасни регулативи и подобра контрола, наша обврска е да обезбедиме пазарот на храна да биде безбеден, транспарентен и во согласност со највисоките стандарди, а во исто време да ја спречиме сивата економија и да ги заштитиме интересите на потрошувачите и легалните производители – рече Мартиновиќ.
