Table of Contents
Психолозите откриваат животен трик што ќе ве направи посреќни за 1 минута
Експертите по психологија тврдат дека постои едноставна техника која може да ни помогне да се чувствуваме пооптимистично и позадоволно, а нејзините ефекти можат да се почувствуваат речиси веднаш. Оваа техника се нарекува „обратна листа на желби“.
Кога размислуваме за среќата, најчесто гледаме кон иднината – размислуваме што би можеле да промениме во животот, односите, кариерата или што нè очекува понатаму. Но, психијатрите советуваат повремено да застанеме и да погледнеме наназад, кон сè она што веќе сме го доживеале и постигнале.
Ако сакате да бидете пооптимистични и позадоволни од животот, еден од корисните пристапи е да практикувате благодарност за убавите настани и искуства кои веќе ви се случиле.
Трик за подобро расположение
За да го подобрите расположението, направете обратна листа на желби. Наместо да ги запишувате настаните на кои се надевате и работите што допрва сакате да ги остварите, насочете го вниманието кон убавите моменти од минатото.
„Многумина од нас имаат листи со желби насочени кон иднината. Но, обратната листа на желби вели: ‘Погледнете што сум постигнал/а во животот. За што сум благодарен/на? Што веќе сум успеала да остварам?’“, објаснува психијатарката Су Варма.
На овој начин, вниманието од она што ни недостига го пренасочуваме кон она што веќе го имаме и кон сè што сме успеале да постигнеме низ животот.
Зошто е важна оваа техника?
Според Варма, правењето обратна листа на желби може да ни помогне да почнеме да гледаме на животот од поинаква перспектива – односно „чашата да ја гледаме како полуполна“, наместо постојано да се фокусираме на она што не е онака како што би сакале.
Истражувањата покажуваат дека практикувањето благодарност може да влијае врз процесите поврзани со расположението, вклучително и врз ослободувањето на невротрансмитери како допамин и серотонин. Тоа може да се случи без разлика дали ги запишуваме работите за кои сме благодарни или само размислуваме за нив.
Некои истражувања покажуваат и дека благодарноста може да биде поврзана со намалување на анксиозноста и симптомите на депресија, подобар квалитет на сонот, како и со помалку стрес и чувство на осаменост.
Поврзани објави
Како да направите обратна листа на желби?
За почеток ви се потребни само хартија и пенкало, а за оваа вежба доволни се околу 10 минути.
Запишете ги моментите кои ви донеле радост, ве направиле горди, задоволни или ви ја зголемиле самодовербата. Тоа можат да бидат големи животни настани, но и сосема мали нешта кои ви останале во убаво сеќавање.
„Клучно е ова да не стане само рутинска активност. Не можете секој ден едноставно да кажувате: ‘Мојот дом, мојот партнер, моите деца’“, додава професорката по психологија од Универзитетот Јејл, Лори Сантос.
Наместо тоа, обидете се да се сетите на конкретен момент кој ви донел особено задоволство.
Помислете на нешто убаво. Што ве изненадило? Кој настан ви измамил насмевка? На што сте горди денес? Што сте успеале да постигнете, иако некогаш ви изгледало многу тешко? Што би сакале да имате уште повеќе во вашиот живот?
Вратете се на чувството што сте го имале тогаш
Додека се присетувате на овие моменти, немојте само да ги набројувате. Обидете се да се сетите како сте се чувствувале тогаш и зошто тој момент ви бил толку важен.
Можеби ќе се сетите на патување кое ви го променило погледот кон животот, на личност која ви помогнала кога ви било тешко, на успех на кој и денес сте горди, на посебен ден поминат со семејството или на некој сосема обичен момент кој дури сега, кога ќе се присетите на него, добива посебно значење.
Со текот на времето, на тој начин ќе создадете своја мала збирка на драгоцени спомени – листа на сè убаво што веќе сте доживеале, постигнале и почувствувале.
А токму таквиот поглед кон минатото може да биде прекрасен потсетник дека животот не е само она што допрва го чекаме, туку и сè она што веќе ни се случило – моментите, луѓето и искуствата кои вреди да ги зачуваме во сеќавањето.
