Екипите на ЈП Комунална хигиена-Скопје отстранија обемна дива депонија лоцирана во населбата Трнодол, во скопската општина Карпош. Подигнати се и транспортирани 12 кубни метри претежно мешан комунален и кабаст отпад.
Воедно, во текот на минатата седмица, Еко-патролата на Претпријатието изготви вкупно 28 едукативно-информативни записници за непрописно одлагање отпад на јавни и сообраќајни површини во централното градско подрачје – во близина на Домот на градежниците, во Старата скопска чаршија, како и во реонот зад Капитол Мол во општината Аеродром.
Во текот на вчерашниот ден, ЈП Комунална хигиена-Скопје отстрани неколку диви депонии лоцирани на улиците Вуковарска, Серава и Славеј планина – во близина на скопското Теќе.
„Екипите на ЈП Комунална хигиена-Скопје подигнаа и транспортираа приближно 30 кубни метри кабаст и мешан комунален отпад од диви депонии во скопската општина Чаир. Станува збор за локации каде што континуирано непрописно се одлага отпад на јавни и сообраќајни површини.
Апелираме до граѓаните својот комунален отпад да го одлагаат исклучиво во наменски поставените садови, а воедно Претпријатието им ја нуди можноста без плаќање паричен надоместок да ги одложат стариот неупотреблив мебел и електричните апарати во центрите за селекција лоцирани во Карпош и во Вардариште.“ – изјави директорката на ЈП Комунална хигиена-Скопје, Косана Николиќ Мазнева.
За време на изминатиот викенд, екипите на ЈП Комунална хигиена-Скопје подигнаа и транспортираа градежен и мешан комунален отпад од неколку диви депонии лоцирани во строгиот центар на градот – зад Т-Мобиле, како и на булеварот АСНОМ и улиците Бојмија и Февруарски поход во скопската општина Аеродром.
По барање на МВР-Скопје, по сообраќајната несреќа што во текот на викендот се случи на булеварот Илинден, екипите на Претпријатието интервенираа со расчистување на теренот и посипување на песок, со цел да се овозможат услови за непречено минување на пешаците и возилата.
Во текот на вчерашниот ден, беа опожарени два пластични контејнера со зафатнина од 3,2 м3 лоцирани на улицата Букурешка, во скопската општина Карпош. Опожарените контејнери се неупотребливи и истите во најкус можен рок ќе бидат заменети со нови садови.
