Додека вниманието во јавноста е насочено кон можноста вештачката интелигенција да замени дел од работните места, европските компании во моментов се соочуваат со сосема поинаков проблем – недостаток на луѓе кои можат веднаш да ги пополнат потребните позиции.
Податоците за европскиот пазар на труд покажуваат дека најголем број слободни места има во професии поврзани со техниката, производството, машинството, транспортот и администрацијата.
Меѓу најбараните профили се техничките работници, за кои има повеќе од 731 илјада слободни позиции. Следуваат административните и канцелариските професии со над 630 илјади огласи, додека металопреработувачката и машинската индустрија имаат потреба од речиси 597 илјади работници.
Голема е побарувачката и за оператори на машини и постројки, со повеќе од 522 илјади слободни места, како и за возачи и работници во транспортот и логистиката, каде што се евидентирани над 519 илјади позиции.
Тоа значи дека само овие пет категории опфаќаат речиси три милиони непополнети работни места.
Недостигот на кадар значително се разликува зависно од економијата и демографската структура на земјите.
Германија, Франција, Австрија, Чешка и Романија имаат особено голема потреба од технички кадар и работници со практични вештини. Во Финска, пак, особено се бараат ИТ професионалци.
Стареењето на населението создава дополнителен притисок врз здравствениот сектор. Во Шведска, Швајцарија и Норвешка постои сериозен недостиг на здравствени работници, а потребата за ваков кадар се очекува дополнително да расте.
На југот на Европа, пак, пазарот на труд има свои специфични потреби. Шпанија, Португалија и Малта бележат голема побарувачка за работници во личните услуги и угостителството, додека сличен тренд е забележан и во Данска.
Трендот покажува дека европскиот пазар на труд се соочува со структурен недостиг на работници, особено во професии кои бараат практични знаења, искуство и специјализирани вештини, пренесува republika.rs.
И покрај брзиот развој на автоматизацијата и вештачката интелигенција, голем дел од европската економија сè уште зависи од луѓето – од оние што ги одржуваат машините, управуваат со производните процеси, возат, работат во здравството, угостителството и обезбедуваат услуги.
Затоа, наместо масовно исчезнување на работните места, европскиот пазар во моментов се соочува со друг парадокс: има работа, но нема доволно работници за да ја завршат.
