Директорката на албанската разузнавачка служба ШИШ, Влора Хисени, е ставена во домашен притвор и суспендирана од функцијата, во рамки на операција на Специјалното обвинителство против корупција и организиран криминал – СПАК, поврзана со истрагата за Националната агенција за информатичко општество.
Специјалниот суд против корупција и организиран криминал ја одобрил мерката за Хисени на барање на СПАК.
Истовремено, истражителите извршиле претрес во домот на поранешниот генерален директор на албанската државна полиција Илир Прода. Според информациите објавени утрово од повеќе албански медиуми, претреси се вршат и на други локации поврзани со сегашни и поранешни функционери.
Операцијата е дел од пошироката истрага за случајот на Национална агенција за информатичко општество, која управува со голем дел од дигиталната инфраструктура и електронските услуги на државата.
Истрагата за АКШИ подолг период е во фокусот на СПАК поради сомневања поврзани со постапки за јавни набавки. Во рамки на предметот претходно беа преземени мерки и против други лица поврзани со агенцијата.
Хисени е на чело на ШИШ од 2023 година. Пред назначувањето во Албанија, таа извршуваше високи функции во безбедносните институции на Косово, меѓу кои и заменик-директор на Косовската разузнавачка агенција.
Засега нема детално официјално соопштение од СПАК со целосен опис на сомневањата што конкретно се однесуваат на Хисени и Прода. Поради тоа, нивната точна улога во предметот и евентуалните кривични дела за кои се води истрагата не треба да се прејудицираат.
Post Views: 93
