Митот дека сексот за време на менструација е штетен за здравјето е одамна разбиен. Сексот во тој период од месецот не носи дополнителен ризик за здравјето ниту за вас, ниту за вашиот партнер. Менструалната крв е природна телесна течност која на никаков начин нема да го надразни пенисот на партнерот, ниту пак ќе им наштети на вашите репродуктивни органи.
Сè додека и двајцата немате сексуално пренослива болест (СПБ) или инфекција, или користите заштита, не постои причина да го избегнувате сексот за време на менструација.
Сексот без заштита во периодот на менструалното крварење не треба да се практикува со непознати партнери, поради непознавањето на нивната здравствена состојба. За време на менструација секрецијата на течности е зголемена, а заедно со неа се зголемува и веројатноста за пренесување на СПБ. Во овој период шансите да бидат предадени болести кои се пренесуваат преку крв, како ХИВ и хепатит, се многу поголеми.
БЕНЕФИЦИИ ОД СЕКСОТ ЗА ВРЕМЕ НА МЕНСТРУАЦИЈА
Сексот за време на менструација може да биде малку поголем предизвик, но тој носи и одредени бенефиции за жената како:
Дополнителна лубрикација
За време на менструацијата влажноста на вагината е зголемена и на повеќето жени сексот им е особено пријатен, затоа што се зголемува чувствителноста и задоволството.
Олеснување на менструалните болки
Кога жената доживува оргазам, во нејзиното тело се зголемува лачењето на ендорфини, што придонесува за намалување на менструалните болки, но и за подобрување на расположението.
Скратување на менструалното крварење
Поврзани објави
Оргазмот предизвикува контракции на матката. Контракциите помагаат менструалната крв побрзо да го напушти телото. Па, доколку доживеете оргазам за време на менструација, не се чудете ако вашиот менструален период трае пократко.
СОВЕТИ ЗА ПОДОБАР СЕКС ЗА ВРЕМЕ НА МЕНСТРУАЦИЈА
Многу жени го избегнуваат сексот за време на менструација поради нередот кој се прави за време на сексуалниот акт. Но, со помош на следниве совети лесно ќе заборавите на нередот и ќе уживате во сексуалниот чин:
Осигурете се дека и вие и вашиот партнер немате проблем со идејата „секс за време на менструација“
Ниту вие, ниту вашиот партнер не треба да се чувствувате принудени кога ќе одлучите да имате секс во „црвените“ денови од циклусот. Не сите мажи се позитивно настроени кон менструалната крв и не сите жени се расположени за секс за време на менструацијата.Пред да стапите во акција, поразговарајте за да се уверите дека и двајцата сте на иста фреквенција.
Избегнувајте ги првите 2-3 дена од менструалниот циклус
Подобро е да го прескокнете сексот во текот на деновите кога имате обилно крварење, затоа што тоа може да придонесе да се чувствувате непријатно, а и ја зголемува веројатноста да направите неред.
Изберете ја мисионерската поза
Најпрепорачлива секс поза за овој период е мисионерската (позата во која жената лежи, а мажот е одгоре). Оваа поза го минимизира течењето на менструална крв, па ќе ги избегнете грижите околу нередот.
Ставете под вас темна крпа или темни чаршафи
Доколку под вас ставите темна крпа, дури и да истечат неколку капки тие нема да бидат видливи за да ви го одвлекуваат вниманието.
