Table of Contents
Ако чувствувате дека ви е потребна пауза од сопствените мисли и потсетник дека несовршениот живот и понатаму вреди – оваа листа е создадена токму за вас.
Self-care не е само СПА-третман, утринска јога или скап ретрит. Понекогаш е доволно да седнете, да пуштите добар филм и да си дозволите да почувствувате. Да се препознаете. Да се насмеете. Да се расплачете. Да сфатите дека не сте сами.
Овие девет наслови докажуваат дека грижата за себе не мора да биде луксузна – туку искрена.
1. Земја на номадите (2020)
Нов почеток по загубата
Ферн, жена во шеесеттите, останува без работа и дом по смртта на сопругот. Наместо да потоне, купува комбе и тргнува на пат како современ номад. Низ Америка, низ сезонски работи и средби со луѓе што исто така изгубиле нешто – таа повторно го пронаоѓа животот.
Франсис Мекдорманд освои „оскар“ за најдобра актерка, а филмот триумфираше и во категориите за најдобар филм и режија (Клои Жао).
За вас е ако: животот неочекувано ви се распаднал – и ви треба доказ дека од урнатините може да израсне нова смисла.
2. Најлошата личност на светот (2021)
Преиспитувања во триесеттите
Џули живее во Осло и постојано го менува правецот – студии, кариера, љубов. Не е сигурна што сака. Чувствува дека доцни. Дека не се вклопува. Дека другите се „понапред“.
Ренате Рајнсве ја освои наградата за најдобра актерка во Кан, а филмот беше номиниран за два „оскара“.
За вас е ако: мислите дека доцните со животот.
Спојлер: не доцните никаде.
3. Минати животи (2023)
Помирување со „што би било кога би било“
Нора, емигрантка од Јужна Кореја, повторно го среќава својот пријател од детството. Средбата отвора прашања за судбината, изборите и љубовите што не сме ги живееле.
Дебито на Селин Сонг беше номинирано за два „оскара“.
За вас е ако: често размислувате за паралелните животи што можеби сте можеле да ги живеете.
4. Среќно да ти биде, Лео Гранде (2022)
Ослободување од срамот
Ненси, вдовица во шеесеттите (Ема Томпсон), решава да ја врати контролата врз својот интимен живот. Преку неочекувано пријателство учи да го прифати своето тело и своите желби.
За вас е ако: се плашите дека е предоцна за ново откривање.
Не е.
5. Чудесната судбина на Амели Пулен (2001)
Малите нешта што значат живот
Срамежливата Амели одлучува да им го разубави животот на другите преку мали гестови – и притоа го менува својот.
Поврзани објави
Пет номинации за „оскар“, култна музика и безвременска магија.
За вас е ако: сакате потсетник дека среќата се крие во ситниците.
6. Барби (2023)
Притисокот да бидеш сè
Совршениот Барбилендер не е доволен. Барби почнува да се прашува кој е нејзиниот вистински идентитет.
Осум номинации за „оскар“ и химната What Was I Made For? која допре милиони.
За вас е ако: чувствувате притисок да бидете совршени во сè – и ви треба дозвола да бидете само свои.
7. Малата мис Саншајн (2006)
Силата на несовршеното семејство
Дисфункционално семејство патува во распаднато комбе за да ја однесе малата Олив на избор за убавина. Патувањето ги менува сите.
Два „оскара“ и безброј топли сцени.
За вас е ако: сакате доказ дека љубовта не мора да биде уредна за да биде вистинска.
8. Дали сум јас ОК? (2022)
Сексуално самооткривање
Луси (Дакота Џонсон) во триесеттите сфаќа дека никогаш не си дозволила целосно да се запознае себеси. Филм за храброста да си кажете вистината.
За вас е ако: ја откривате својата сексуалност или поминувате низ турбуленции во пријателствата.
9. Само без грижи (2008)
Оптимизмот како избор
Попис е ведра учителка која одбива да стане цинична, дури и кога светот ја тестира.
Сели Хокинс освои „златен глобус“ за оваа улога.
За вас е ако: ви треба инспирација да останете светлина во време кога е полесно да се затемните.
Филмот како терапија
Не ви треба совршен живот за да заслужувате мир. Не ви требаат сите одговори за да продолжите напред. Понекогаш е доволно само да седнете, да пуштите приказна и да си дозволите да почувствувате. Тоа исто така е грижа за себе.
Текст: Убавина и здравје
Фото: Unsplash/Јeshoots.com
