Во текот на ноември 2025 година, на градежните работи за изградба на автопатите на коридорите 8 и 10д, реализирани од страна на американско-турскиот конзорциум „Бехтел и Енка“, биле ангажирани 2.131 лице. Оваа бројка ги опфаќа вработените на изведувачот, подизведувачите, индиректните даватели на услуги, како и специјализираните изведувачи. Дополнително, на терен биле присутни 1.290 парчиња опрема. Овие податоци се дел од Извештајот за напредок на работите за споменатиот месец, објавен на интернет страницата на Јавното претпријатие за државни патишта (ЈПДП).
Според истиот Извештај, во ноември претходната година, на изведувачот му биле исплатени 1.149.367,247 денари.
Активностите во овој период главно се фокусирале на геотехнички испитувања, изготвување на техничка документација и спецификации за автопатите, како и проекти за експропријација. Исто така, биле спроведени мерки за привремено управување со сообраќајот, демолирање и отстранување на постоечки објекти и други елементи на трасата, како и градежни активности, претежно од земјен карактер, инфраструктура за одводнување и изградба на објекти.
Извештајот потврдува дека геотехничките истражни работи се комплетно завршени на првата делница, Тетово-Гостивар. На делниците Гостивар-Букојчани и Прилеп-Битола, овие истраги се во тек.
На наведените делници, на терен се одвиваат градежни активности поврзани со земјени работи, изградба на конструкции и уредување на системите за одводнување.
За третата делница, Струга-Требеништа, започната е изработка на студија за процена на влијанието врз животната средина и социоекономските аспекти (ESIA).
Во моментов се реализираат активности на седум мостови, осум надвозници и три подвозници. Заклучно со крајот на ноември 2025 година, изведени се повеќе од 4,9 милиони кубни метри земјени ископи и 1,45 милиони кубни метри насипи.
Покрај тоа, поставени се 20.500 метри коловозни конструкции, а за конструктивни работи се искористени 63.000 кубни метри бетон. За потребите на одводнување, изведени се 13.000 кубни метри бетонски работи, што е потврдено со податоците од Извештајот.
Во текот на 2025 година, на Конзорциумот „Бехтел и Енка“ му биле исплатени вкупно 147 милиони евра. За актуелната година, според најавите, се планирани средства во износ од 103 милиони евра.
Директорот на ЈПДП, Коце Трајановски, претходно изјави за МИА дека на Делница 1 (Тетово-Гостивар), од вкупно 17,5 километри, 13 километри се веќе отворени за градежни работи. На Делница 2 (Гостивар-Букојчани), од 31 километар, достапни се 9,6 километри, а на Делница 4 (Прилеп-Битола), од 40 километри, отворени се 22 километри.
„Клучните активности во 2026 година ќе бидат насочени кон овозможување пристап и создавање услови за изведбени работи на целиот опфат на делниците 1, 2 и 4. За Делницата 3, Требеништа – Ќафасан, во тек е изработка на сериозна документација која ќе обезбеди прецизни насоки за заштита на биодиверзитетот и културното наследство при дефинирањето на трасата за оваа патна делница“, најави Трајановски.
Четирите автопатски делници, кои се дел од проектот, опфаќаат вкупна должина од 109 километри. Во рамките на овие делници предвидена е изградба на 24 подвозници, 34 надвозници, како и мостови со вкупна должина од 4.500 метри.
