Гужви за упис на ФИНКИ, идните бруцоши во 2023 поднесуваат хартиени документи [фото]

Во 2023 година, студентите по софтверско инженерство и информациски системи, по програмирање, по компјутерско инженерство и други студиски програми се запишуваат на Факултетот за информатички науки и компјутерско инженерство (ФИНКИ), со доставување на документи во хартиен формат. Стотици млади денеска чекаа во ред за да ги поднесат документите. Пред зградата на Технолошко-металуршкиот факултет денеска цел ден „дежураат” идните академски граѓани.

Гужвите за запишување на студентите пред факултетските згради на Универзитетот „Св. Кирил и Методиј“ секоја година се повторуваат. И лани, имаше редица на студенти кои чекаа за да се запишат на ФИНКИ. Мета.мк пишува со години наназад за овој проблем со гужвите при запишување.

И годинава, студентите на ФИНКИ кои сакаат да се запишат во академската 2023/2024 година, најпрво треба да одат во банка за да ја платат првата рата за студирање, заедно со другите неопходни уплатници, како што се 750 денари за административно материјални трошоци и осигурување. Откако ќе завршат во банка, студентите ги пречекува гужва за запишување пред самиот факултет. Ова е така, поради тоа што на факултетите на УКИМ студентите не можат да платат директно со картичка при запишувањето.

Инаку, на огласната табла на ФИНКИ е објавено дека првиот уписен рок ќе се изврши на 12 септември, во периодот од 8:30 до 13:30 часот. Меѓу десетината документи кои студентите треба да ги поднесат за упис, се и хартиен индекс и студентска легитимација (со залепена слика).