WhatsApp се доста активни изминатиот период, па доста често има што да се напише за новините кои ги додаваа на нивната апликација.
Најновата функција која станува дел од оваа апликација е можноста за испраќање на инстант видео пораки. Се работи за надоградба на веќе достапната и позната функција за испраќање на аудио пораки, па корисниците сега можат да додадат и видео.
Видео пораките се испраќаат од истото место како аудио пораките, а сега е достапна можност за вклучување на камерата. Исто како за аудио пораките, снимањето се прави додеа е притиснато копчето за снимање, а истото може да се заклучи со повлекување нагоре за снимање без да мора да се држи телефонот.
Видео пораките може да бидат долги до 60 секунди, а се покриени со заштитата како и другите пораки, односно се од-крај-до-крај шифрирани.
Испратените и добиените видео пораки ќе се прикажуваат во форма на круг, а ќе започнуваат автоматски без звук, па притискање на видеото ќе го додаде и звукот и ќе го зголеми форматот за подобро гледање.
Од WhatsApp истакнуваат дека оваа новина веќе им се пушта на корисниците, а сите треба да ја добијат во неделите што следат.
