Почетна ЕкономијаДизајн, архитектура и креативно претприемништво: Што носи викендот на Skopje Design Week 2026?

Дизајн, архитектура и креативно претприемништво: Што носи викендот на Skopje Design Week 2026?

од nenad
2 минути читај за

Public Room во Скопје овој викенд ќе биде место за средба на дизајнери, архитекти, уметници и претприемачи, во рамки на Skopje Design Week 2026. Денешната и утрешната програма носат шест тематски содржини, преку кои ќе се дискутира за иднината на креативните индустрии, одржливото создавање, зачувувањето на традицијата и развојот на локалната уметничка сцена.

Посетителите ќе имаат можност да проследат две панел-дискусии и четири предавања од едукативниот циклус EDU TALKS, со учество на домашни и странски професионалци од областа на архитектурата и дизајнот.

Саботните активности ќе започнат со разговорот „Од визија до реалност – предизвиците на сопственото претприемништво“. Учесниците ќе ги разгледуваат пречките со кои се соочуваат оние што сакаат сопствената креативна идеја да ја претворат во успешен и долгорочно одржлив бизнис. Посебен акцент ќе биде ставен на финансирањето, институционалната поддршка и можностите за развој на малите претпријатија во креативниот сектор.

Архитектурата и нејзината поврзаност со другите уметнички дисциплини ќе бидат тема на предавањето „Помеѓу“ на проф. д-р Љупчо Јованов. Следува презентацијата на архитектонскиот истражувач Тони Левак, насловена „Компонентата памети – Создавање згради од делови што го знаат своето минато“, посветена на повторното искористување на градежните материјали и нивната вредност во современото градење.

Неделната програма ќе го насочи вниманието кон домашната креативна заедница. Панелот „Твориме тука: иднината на локалната креативна сцена“ ќе отвори дискусија за професионалните услови, предизвиците и перспективите на независните уметници и дизајнери во Македонија.

Во едукативниот дел, дизајнерката Јана Ацевска ќе го претстави предавањето „Рефлексии – Традицијата како современ дизајнерски јазик“, во кое ќе ја истражи можноста традиционалните елементи да добијат нова примена преку современиот дизајн.

Програмата ќе ја заокружи грчкото студио „papairlines“ со темата „Секојдневни решенија за вообичаени проблеми“. Преку принципите на DIY дизајнот ќе бидат презентирани алтернативни начини за осмислување и изработка на производи што одговараат на потребите од секојдневието.

Влезот за сите предавања и дискусии е бесплатен, а настаните ќе се одржат во Public Room.

Skopje Design Week 2026 трае од 21 до 27 ноември под мотото „Crafting Tomorrow“. Годинешното издание ја истражува врската меѓу традиционалното занаетчиство и современите иновативни практики, со идеја да се поттикне создавање нови вредности преку спојување на наследството и модерниот дизајн.