Почетна ЕкономијаЕкспресниот пат Кочани – Виница – Делчево ќе почне да се гради во 2027 година

Експресниот пат Кочани – Виница – Делчево ќе почне да се гради во 2027 година

од nenad
2 минути читај за

Изградбата на новиот експресен пат што треба да ги поврзе Кочани, Виница и Делчево, со дополнителна клучка кон Македонска Каменица, се планира да започне кон крајот на летото или во раната есен 2027 година. Ова го најави премиерот Христијан Мицкоски при денешната посета на Делчево, посочувајќи дека проектот веќе е претставен пред меѓународни финансиски институции.

За трасата биле разгледувани две можни решенија, по што на јавната расправа била избрана една од предложените варијанти. Во моментов се работи на студијата за изводливост и документацијата за влијанието врз животната средина, а паралелно се водат разговори за обезбедување финансиски средства.

Мицкоски информираше дека проектот бил презентиран пред Европската инвестициска банка и Европската банка за обнова и развој, до кои веќе е доставена и официјална апликација.

Според најавениот временски план, потребните студии и проектните концепти треба да бидат готови напролет, по што би следеле следните активности за реализација на инвестицијата.

„Ако сè оди според очекувањата, напролет би требало да бидат завршени студиите и концептите за избраната варијанта. Очекувам камен-темелникот да биде поставен кон крајот на летото или на почетокот на есента во 2027 година“, изјави премиерот.

Тој оцени дека новата сообраќајница ќе придонесе за подобро поврзување на источниот регион со останатите делови од земјата, а особено ќе го олесни движењето меѓу населените места во овој дел на државата.

Покрај изградбата на експресниот пат, најавени се и други инфраструктурни зафати во Делчево и околината. Според Мицкоски, од понеделник треба да започне реконструкцијата на патот што води од Делчево до граничниот премин со Бугарија.

Завршена е и постапката за избор на изведувач за санација на мостот на излезот од Делчево, на патниот правец кон Македонска Каменица и Кочани. Со тоа се создадени услови да започнат работите на објектот.

За време на посетата на Делчево, премиерот беше придружуван од министерот за здравство Сашо Клековски и министерот за спорт Борко Ристовски. Тие извршија увид во реконструктивните активности во Здравствениот дом „Гоце Делчев“, како и во почетокот на работите за обновување на градската спортска сала.