Народната банка на Србија донесе одлука за одземање на дозволата за работа на Алта банка, финансиска институција во сопственост на бизнисменот Давор Мацура, кој во јавноста се поврзува со владејачката Српска напредна партија на Александар Вучиќ. По затворањето на филијалите, клиентите останаа без можност да ги користат платежните картички и да вршат домашни и меѓународни трансакции.
Одлуката доаѓа во период на зголемено внимание кон деловните активности на Мацура, особено по обвинувањата за сомнителни финансиски трансакции и наводни префрлања на големи суми пари во странство. Според објавените информации, стечајната постапка следуваше само една недела по изборниот пораз на власта.
Мацура го започнал својот бизнис со менувачници под брендот Алта, но во изминатите четиринаесет години изградил широка мрежа на финансиски услуги и платен промет низ Србија. Неговата компанија станала важен канал за секојдневни плаќања, а меѓу институциите што ги користеле нејзините услуги било и Електростопанство на Србија, преку чија платформа Алта пеј граѓаните ги плаќале сметките за електрична енергија.
Значаен пресврт во неговата деловна експанзија било преземањето на Јубмес банка, која подоцна го добила името Алта банка. Со тоа Мацура од сопственик на менувачници прераснал во влијателен играч во финансискиот сектор.
Неговите деловни активности во меѓувреме се прошириле и во малопродажбата. Алта група потпишала договор со хрватската Фортенова група за преземање на пет компании во Србија, меѓу кои се и трговските синџири ИДЕА, Рода и Меркатор. Овој договор требало да ѝ овозможи на групацијата значајна позиција на српскиот пазар за продажба и снабдување со прехранбени и други производи за широка потрошувачка.
Случајот со банката предизвикал реакции и барања за институционална проверка. Белградскиот адвокат Иван Ниниќ побарал Народната банка на Србија да спроведе вонреден надзор, поради сомневања дека преку Алта банка биле префрлани десетици милиони евра во странство. Во наводите се споменуваат и трансакции поврзани со Русија и Северна Македонија.
Откако филијалите биле затворени, загрижени клиенти се собрале пред експозитурите во Нови Сад и во други градови, обидувајќи се да добијат информации за своите средства. Народната банка соопштила дека ликвидноста на Алта банка била сериозно нарушена, поради што биле прекинати сите платежни услуги, вклучително и работењето со картички, домашниот и девизниот платен промет.
За исплатата на средствата на депонентите е задолжена Агенцијата за осигурување на депозити на Србија. Согласно законските правила, осигурените депозити се гарантирани до износ од 50.000 евра по клиент, а исплатата треба да започне во рок од седум работни дена, според процедурите на надлежните институции.
