Хоџа пред амбасадорите на ЕУ: Правото на мирен протест е основно, насилството не може да се оправда

Фото: Министерство за Европа и надворешни работи

Министерот за Европа и надворешни работи на Албанија, Ферит Хоџа, денеска одржа средба со амбасадорите на земјите членки на Европската Унија во Албанија, на која се разговараше за последните случувања во земјата.

За време на средбата, Хоџа ја истакна непоколебливата посветеност на Владата кон демократските слободи, вклучително и основното право на мирно протестирање. Тој нагласи дека насилството, вандализмот и нападите врз јавниот или приватниот имот не можат да се прифатат како легитимни средства за политичко или каков било друг вид изразување.

Овој принцип, како што посочи министерот, важи во Албанија, но и во цела Европа.

На средбата беше разговарано и за важноста од зачувување на институционалната стабилност, почитувањето на владеењето на правото, како и обезбедувањето законитост и пропорционалност во сите постапки на јавните институции.

Хоџа ја потврди подготвеноста на Владата за дијалог во секое време, на секое место и со сите што не се вклучени во насилни дејствија. Тој го оцени дијалогот како демократска вредност и најдобар начин за надминување на разликите, решавање на загриженостите и заедничко напредување.

Осврнувајќи се на процесот на европска интеграција, министерот истакна дека членството во Европската Унија останува стратешка национална цел на Албанија.

„Тешките моменти треба да ја зајакнат нашата решителност, а не да нè оддалечат од реформите, демократските стандарди и одговорностите што произлегуваат од нашата амбиција за членство во Европската Унија“, изјави Хоџа.

На крајот, тој ја поздрави отворената размена на мислења со европските партнери и нивната континуирана посветеност кон Албанија, во насока на остварување на заедничката цел – иднина на земјата во Европската Унија.

Post Views: 54