Во просториите на Народната банка се одржа официјална работна средба на која гувернерот, Трајко Славески го прими во официјална посета претседателот на Централниот совет на Македонците во Германија, Роберт Кленкоски. Оваа средба помина во знак на отворен и високостручен монетарен дијалог, фокусиран на економската сигурност, целокупниот банкарски систем и заштитата на капиталните права на македонските државјани кои живеат и работат во странство.
За време на разговорот, претседателот Кленкоски ја нагласи економската позиција на Централниот совет за заштита на правата на Македонците во Германија дека девизните дознаки и директните финансиски влогови од нашите сограѓани во странство се еден од клучните столбови за стабилноста на домашниот девизен пазар и макроекономската ликвидност. Како организација која бескомпромисно се залага за заштита на економските права на нашите сограѓани надвор од татковината, г-дин Кленкоски ја претстави начелната платформа за дискусија насочена кон дебирократизација на регулативите во делот на инвестирањето:
1. Модернизација на платниот промет и елиминирање на административните кочници при трансфер на капитал
- Реален контекст на проблемот: Македонските државјани во Германија кои сакаат да префрлат легално заработен капитал во татковината за купување недвижности, бизнис-инвестиции или семејна поддршка, често се соочуваат со комплицирани и застарени процедури од банкарскиот сектор. Од нив се бара прекумерна документација за потекло на парите, иако тие средства веќе претходно поминаа низ строгите проверки на германските банки и даночни системи.
- Позиција на Советот: Монетарниот систем мора да овозможи брз и олеснет проток на легалните девизни приливи од ЕУ-зоната. Централниот совет побара од Народната банка, во рамките на своите регулаторни надлежности, да донесе дополнителни олеснувања во своите одлуки и регулативи за платниот промет. Банкарскиот сектор треба да воведе поедноставени дигитални процедури за прием на дознаки кои доаѓаат од докажани деловни и приватни примања во странство, со цел да се стимулира похрабро пласирање на капитал во домашната економија.
2. Парадоксот при станбено кредитирање: Признавање на германските примања и странските гаранции
- Реален контекст на проблемот: Многу наши сограѓани кои работат во Германија се соочуваат со апсурден административен зид во татковината. Додека германските банки, врз основа на нивната германска плата и сигурност на работното место, без никаков проблем би им одобриле долгорочно финансирање за купување стан или куќа во Германија, банкарскиот сектор во Македонија комплетно го одбива финансирањето за купување недвижност во Македонија. Домашните банки одбиваат да ги признаат нивните германски примања, договори за вработување или странски жирантства, со што директно им ја одземаат можноста на нашите луѓе да инвестираат во сопствен дом во татковината.
- Позиција и конкретен предлог на Советот: Централниот совет побара од Народната банка да изработи регулаторна рамка по примерот на напредните ЕУ-земји и успешното регионално решение од Србија. Во земји како Португалија, Шпанија и Ирска, но и во соседна Србија, централните банки имаат уредено јасни регулативи со кои целиот банкарски сектор е обврзан целосно да ги признава легалните ЕУ-примања, германските платни листи и официјалните извештаи од кредитни бироа како што е германската SCHUFA како легитимен еквивалент на домашното кредитно биро. Преку овој модел, на граѓаните во странство им е овозможено редовно да подигнуваат станбени кредити со залог (хипотека) на самата недвижност во татковината или странско жирантство. Кленкоски предложи Народната банка итно да воведе ваква рамка за македонскиот банкарски сектор, со цел да се отвори овој голем инвестициски мост за нашите повратници од странство.
3. Компаративна заштита на девизните влогови и усогласување на гаранциите за штедење
- Реален контекст на проблемот: Постои сериозна разлика во законските гаранции за девизните влогови на граѓаните помеѓу европскиот и домашниот систем, што директно влијае врз одлуката на нашите луѓе во странство каде да ги чуваат своите капитални заштеди. Додека во СР Германија и низ целата Европска Унија девизните заштеди се заштитени до висина од 100.000 евра по клиент и банка, во Македонија Фондот за осигурување на депозити гарантира износ само до 30.000 евра.
- Позиција на Советот: За да се подигне меѓународната доверба и масовно да се привлечат заштедите на нашите сограѓани во домашниот банкарски сектор, Македонија мора постепено да ги усогласи овие заштитни прагови со европските стандарди. Централниот совет побара од Народната банка да ја земе предвид оваа разлика при креирањето на идните монетарни регулативи, со цел да се даде дополнителен институционален поттик за иселениците без страв да го депонираат својот капитал во татковината.
Потврда за стабилноста на денарот и сигурноста на монетарниот систем
Како исклучително позитивен аспект од средбата, гувернерот д-р Трајко Славески детално го запозна претседателот Кленкоски со актуелната монетарна состојба во земјата. Гувернерот презенторираше одлични показатели кои ја потврдуваат апсолутната стабилност на денарот, конзистентното одржување на ниската стапка на инфлација и високата ликвидност на целиот македонски банкарски сектор. Д-р Славески нагласи дека девизните резерви на државата се на историски највисоко ниво, што гарантира дека девизните штедни влогови и капиталните пласмани на нашите сограѓани од странство се целосно безбедни и заштитени од какви било пазарни шокови. Ваквите позитивни монетарни параметри испраќаат јасен сигнал на доверба и сигурност за секој Македонец кој планира да го инвестира својот капитал во татковината.
Охрабрување на меѓународната соработка
Во однос на меѓународната соработка, Кленкоски ја охрабри Народната банка активно да го развива стручниот и техничкиот пренос на искуства со Бундесбанката и водечките европски финансиски регулатори. Тој нагласи дека Централниот совет силно ги поддржува сите процеси кои носат монетарна сигурност и нуди сопствена поддршка во Берлин за сите идни проекти кои ја зајакнуваат финансиската стабилност на земјата.
Заложба за континуиран економски дијалог
По завршувањето на дискусијата, двете страни дадоа цврста заложба за долгорочно одржување на редовниот контакт со цел креирање поповолен финансиски амбиент за нашите сограѓани во странство. Претседателот Кленкоски изрази длабока почит кон гувернерот Трајко Славески за неговиот висок професионализам, меѓународен реноме и стабилно водење на монетарната политика на државата.
Post Views: 110
