Турција започна проект за развој на сопствена линија паметни телефони, во кој се вклучени одбранбената компанија ASELSAN, телекомуникацискиот оператор Türk Telekom и компанијата TTT İnovasyon, објави CNN Türk.
Според најавите, првиот уред би требало да биде претставен во првиот квартал од 2027 година. Проектот опфаќа развој на вкупно три модели, со различна намена.
Еден од телефоните ќе биде специјално наменет за државните институции и службениците. Станува збор за премиум уред со напредни безбедносни карактеристики и енкриптиран систем за комуникација, чија примарна функција ќе биде заштита на чувствителните комуникации.
Покрај моделот за државната администрација, планирани се уште два паметни телефони за поширокиот пазар. Тие ќе бидат достапни за граѓаните, а повеќе детали за нивната опрема, дизајн и технички карактеристики се очекуваат во наредните фази од проектот.
Проектот претставува уште еден чекор во напорите на Турција да развива домашни технолошки производи и да ја намали зависноста од странски технологии, особено во чувствителните области поврзани со безбедноста и комуникациите.
Целосните спецификации, цените и комерцијалните детали за новите уреди засега не се објавени.
