Table of Contents
Ако безбедноста ви е важен критериум при изборот на дестинација за одмор, најновото истражување на Berkshire Hathaway Travel Protection ги открива деветте најбезбедни земји за патување.
Станува збор за годишна листа што веќе десет години ги рангира државите според степенот на сигурност за туристите, земајќи ги предвид факторите како стапката на криминал, политичката стабилност и квалитетот на инфраструктурата.
На самиот врв се наоѓаат земји што генерално важат за мирни и безбедни за посетителите, но секоја од нив има и свои специфичности на кои патниците сепак треба да обрнат внимание.
Холандија
Холандија годинава е прогласена за најбезбедна дестинација за патување. Особено се издвојува по високото ниво на сигурност за жени и туристи од различно потекло, што ја прави многу отворена и инклузивна земја.
Сепак, дури и во толку безбедно опкружување постојат работи на кои треба да се внимава. Во градови како Амстердам, најголемиот предизвик за посетителите не е криминалот, туку секојдневниот сообраќај – пред сè бројните велосипеди и многу прометните велосипедски патеки, на кои туристите често мора да се навикнат.
Австралија
Австралија се наоѓа високо на листата на најбезбедни дестинации благодарение на ниската стапка на криминал и стабилниот општествен систем, што генерално ја прави безбедна за туристите.
Сепак, посетителите мора да бидат внимателни при влез во земјата, бидејќи важат многу строги правила, особено кога станува збор за внесување храна, растенија и производи од животинско потекло.
Освен тоа, важно е да се имаат предвид и специфичностите на локалната природа – одредени видови диви животни можат да бидат потенцијално опасни доколку не се почитуваат безбедносните упатства.
Австрија
Австрија оваа година првпат се најде меѓу водечките безбедни дестинации, пред сè благодарение на стабилната политичка состојба и општото чувство на сигурност во земјата.
Сепак, како и во повеќето големи европски престолнини, повремените протести во Виена можат да претставуваат потенцијален ризик на места со масовни собири, па затоа се препорачува основна претпазливост.
Исланд
Исланд со години важи за една од најбезбедните земји во светот, но оваа година бележи благ пад на листата.
Причината не е зголемен криминал или нестабилност, туку засилената вулканска активност што повремено може да влијае врз авионскиот сообраќај и плановите за патување, па од посетителите се бара поголема флексибилност при организацијата на патувањето.
Поврзани објави
Канада
Канада е меѓу најстабилните и најбезбедни земји во светот, со многу ниска стапка на криминал и добро развиени јавни системи.
Сепак, во поголемите градови се препорачува основна претпазливост поради ситни кражби и кражби од возила, што се најчестите безбедносни проблеми за туристите.
Нов Зеланд
Нов Зеланд е познат по недопрената природа, мирот и високото ниво на безбедност, но на туристите им се советува дополнителна претпазливост на планинските и авантуристичките локации.
Таквите терени можат да бидат ризични без соодветна опрема или водич, па затоа се препорачува активностите во природа да се планираат одговорно и според локалните насоки.
Швајцарија
Швајцарија важи за една од најуредените и најбезбедни земји во светот.
Сепак, најголемиот ризик за посетителите не доаѓа од луѓето, туку од природата – особено во алпските региони, каде што лавините и наглите временски промени можат да претставуваат сериозна опасност.
Јапонија
Јапонија е меѓу земјите со најниска стапка на криминал, што ја прави исклучително безбедна за туристите.
Сепак, посетителите треба да бидат внимателни кога станува збор за правилата за влез и престој, особено во врска со внесување лекови и одредени производи, бидејќи прописите се строги и прецизно дефинирани.
Ирска
Ирска е високо рангирана поради сигурноста и стабилноста, но туристите што не се навикнати на возење по левата страна од патот треба да бидат особено внимателни во сообраќајот.
Фото: Pexels
