Синот на покојниот актер Ален Делон, Ентони Делон, беше испрашуван од полицијата како дел од прелиминарната истрага за околностите околу смртта на кучето во сопственост на неговиот брат, Ален-Фабиен Делон, јавуваат француските медиуми.
Истрагата ја започна обвинителството во Монтаржи на северот од Франција, по обвинувањата дека Ентони Делон е одговорен за смртта на петгодишното куче од расата белгиски малиноа по име Оба, објавува БФМТВ.
По сослушувањето, Делон беше ослободен.
Во објава на социјалните мрежи во март, Ален-Фабиен Делон го обвини својот брат дека наредил кучето да биде застрелано, тврдејќи дека животното било во агонија околу 45 минути.
Ентони Делон ги негираше обвинувањата, наведувајќи дека кучето покажувало агресивно и нестабилно однесување и претходно каснувало луѓе околу нив.
Тој тврди дека инцидентот кулминирал кога кучето нападнало друго куче во сопственост на семејството кое било домашно милениче на покојниот Ален Делон, поради што обезбедувањето одговорило со огнено оружје.
-Јас го избрав нашето куче Луба, нашето семејство, она што остана од нашиот татко… – рече Ентони Делон.
Тој изјави дека кучето набрзо им подлегнало на повредите, негирајќи ги обвинувањата за продолжена агонија.
Делон најави дека ќе поднесе тужба против својот брат за лажно пријавување.
Фото: Јутјуб Принтскрин
