Table of Contents
Иако ладната вода штеди струја, некои работи не можат доволно да се исчистат на тој начин
Многумина од нас поголемиот дел од гардеробата го перат во поладна вода – така штедат струја, сметките се намалуваат, а темните бои подолго остануваат непроменети. Сепак, ниските степени на перење не се секогаш најдоброто решение. Постојат работи на кои им треба повисока температура за навистина да се отстранат бактериите, маснотиите и тврдокорните дамки, особено поради тоа што програмите за дезинфекција зависат токму од топлината.
Експертите предупредуваат дека одредени работи не може да бидат доволно чисти ако се перат во ладна вода. Ова се најчестите примери…
1. Крпи, сунѓери и прибор за чистење
Крпите и сунѓерите се користат во кујната и бањата – места каде што се задржуваат бактерии како ешерихија коли и други микроорганизми. Перењето во ладна вода честопати не е доволно за да ги уништи, па тие можат да преживеат и повторно да се прошират при следната употреба. Поради тоа, се советува перење на најмалку 60 степени или користење посебна програма за дезинфекција.
2. Кујнски крпи и ракавици за рерна
На овие предмети се насобираат маснотии, остатоци од храна и непријатни мириси. Проблемот е во тоа што маснотиите не се раствораат во ладна вода, па по перењето честопати останува лепливо чувство и застоен мирис. Најдобро е флеките да се третираат претходно со средство за одмрсување, а потоа да се исперат во топла или врела вода.
3. Повеќекратни торби за пазарење
Поврзани објави
Платнените и еколошките торби се практични и долготрајни, но лесно може да станат легло за бактерии. Намирниците, особено живото месо и живина, можат да пуштат течности што нема да ги забележите веднаш. Затоа, се препорачува редовно перење на повисоки температури, особено ако торбата се користи за носење храна.
4. Работи што може да бидат извалкани со фекалии
Платнените пелени, подлогите за преслекување, детската гардероба, долната облека и чорапите спаѓаат во групата работи што никако не се перат со ладна вода. Овие работи треба да ги перете одвоено од преостанатата облека и на доволно висока температура за да се уништат бактериите и да се намали ризикот од инфекции.
5. Крпи и простирки за во бања
Крпите и простирките во бањата постојано се изложени на влага, а при пуштањето вода во тоалетната школка, ситни капки може да завршат токму на нив. Ако се перат во ладна вода, микроорганизмите може да останат заробени во влакната. За вистинско чувство на чистота и свежина, топлата или врела вода е далеку посигурен избор.
6. Спортска гардероба
Облеката за тренинг впива пот, а со тоа и бактерии кои предизвикуваат непријатни мириси. Перењето во ладна вода честопати не е доволно за да се отстранат целосно. Експертите препорачуваат перење во топла вода со детергент наменет за спортска гардероба, која може подлабоко да продре во влакната. За да се сочува еластинот, најдобро е да одберете нежна програма и сушење на воздух.
ФОТО: anniespratt / Unsplash
