Бугарскиот функционер Спас Ташев вели дека македонските камионџии треба да станат бугарски државјани за да ги избегнат проблемите и блокадите.
Изјавата негова предизвика бурни реакции во јавноста. Коментарот доаѓа во период на засилени тензии и незадоволство кај македонските превозници, кои со денови се соочуваат со застои, административни пречки и блокади на граничните премини.
Македонските камионџии реагираат дека ваквите изјави се навредливи и ја префрлаат одговорноста од институциите врз поединците, наместо да се бара системско решение за проблемите со транспортот, дозволите и третманот на македонските компании. Според нив, правото на слободно движење и еднаков третман не смее да зависи од државјанството, туку од меѓународните договори и европските правила.
Од здруженијата на превозници порачаа дека ќе продолжат со притисокот кон институциите за итно решавање на проблемите, нагласувајќи дека ваквите пораки само дополнително ги продлабочуваат недоразбирањата меѓу двете држави.
