Цените на прехранбените производи во јуни се доближија до највисоката точка во последните две години, поради порастот на цените на месото и растителните масла кој го надмина значителниот пад на цените на шеќерот и житарките. Ова е наведено во извештајот на Организацијата за храна и земјоделство на Обединетите нации (ФАО), објавен денес.
Индексот на цени на ФАО за основните прехранбени артикли во јуни изнесуваше 128,0 поени, што е за 0,5 проценти повисоко од мај. Неговата вредност речиси го достигна највисокото ниво во последните две години, од 128,2 поени, кое беше забележано во април. Во споредба со јуни минатата година, цените се повисоки за 5,8 проценти.
Растителните масла забележаа најголем скок во мај, со пораст од 2,3 проценти. Цените на палминото, репкиното и соиното масло се зголемија поради зголемената побарувачка во секторот за биогорива. Од друга страна, цените на сончогледовото масло незначително се намалија поради зголеменото производство во регионот на Црното Море.
Цените на месото, исто така, забележаа значителен пораст од 2,1 проценти, достигнувајќи ново рекордно ниво од кога ФАО објавува податоци. Зголемувањето на цените на говедското, свинското и овчото месо го надмина падот на цените на живината. “Цените на храната во јуни се приближија до највисокото ниво во две години, бидејќи скокот на цените на месото и растителните масла го надмина значително поевтиниот шеќер и житарки”, стои во извештајот.
Млечните производи поскапеа за 0,5 проценти во јуни, бидејќи ограничената понуда во Океанија и ЕУ, заедно со континуирано високата побарувачка во Азија, ги подигнаа цените на путерот на највисоко ниво од кога ФАО објавува податоци.
Шеќерот, од друга страна, значително поевтини во јуни, четврти месец по ред, со пад од 5,2 проценти во однос на мај. Тоа е најниско ниво на цените од април 2021 година, под влијание на очекувањата за исклучително добар род на шеќерна трска во Бразил, Индија и Тајланд, водечките производители, поради поволните временски услови и поголемите засеани површини.
Цените на житарките, исто така, се намалија во јуни за 1,5 проценти на месечно ниво, како одраз на остриот пад на цените на пченката, втор месец по ред, поради обилната понуда од Аргентина и Бразил. Пченицата поскапе поради стравувањата дека сушата би можела да го загрози родот во Русија, САД и одредени делови од ЕУ.
Во посебен извештај за понудата и побарувачката на пазарот на житарки, ФАО благо ја подигна проценката за глобалното производство на житарки оваа година, на 2,925 милијарди тони, што е ново рекордно ниво. Тоа би значело пораст од 2,3 проценти во однос на минатата година. “Иако вкупните изгледи за пченица, пченка и ориз се подобрени, агенцијата нагласува дека прогнозираното топло и суво време во одредени клучни региони би можело да влијае на производството, особено на пченката.”
ФАО проценува дека светската потрошувачка на житарки ќе порасне за 0,8 проценти во сезоната 2025/2026, на 2,898 милијарди тони. Залихите на житарки треба да бидат повисоки за 2,2 проценти на крајот на актуелната сезона, во јули следната година, отколку на почетокот, и да изнесуваат 889,1 милиони тони. Светската трговија со житарки треба да порасне за 1,2 проценти во новата сезона, на 486,9 милиони тони, со засилен извоз на пченица и ориз и благо намалување на обемот на трговија со пченка, предвидува ФАО.
