Ви откриваме совети како да го направите поврзувањето со партнерот по породувањето што е можно побезболно.
Доаѓањето на бебе во семејството носи неизмерна радост, но и бројни предизвици, особено кога станува збор за партнерски однос. Заморот, недостатокот на сон, промените во ритамот на денот и новите обврски често влијаат на поврзаноста со партнерот, а многу парови во првите неколку месеци по раѓањето на детето се соочуваат со чувство на оддалеченост и недоразбирање. Меѓутоа, со свесна посветеност, можно е не само да се обнови врската туку и да се продлабочи низ оваа нова фаза од животот.
Многу новопечени родители често зборуваат за тоа, но суровата реалност е дека, со доаѓањето на бебето, врската се заладува и речиси секој поминува низ фазата „цимер“ со својот партнер. Сепак, можно е повторно да се разгорат страстите и да се разбуди таа заспана искра, доколку двајцата се трудите доволно. Подолу ви нудиме стручни совети кои можат да ви помогнат.
Прифатете ја промената како природен дел од врската
Првиот чекор во повторното поврзување е разбирањето дека вашата врска е влезена во нова фаза. Вие веќе не сте само партнери, туку и родители. Ова не значи дека романтиката мора да исчезне, туку дека треба да се прилагоди.Не ја споредувајте вашата врска со она што беше порано, туку изградете нова форма на блискост.
Комуникација
Еден од најголемите предизвици со доаѓањето на детето е недостатокот на време за отворен и искрен разговор. Сепак, квалитетната комуникација е клучот за разбирање на потребите на двајцата партнери. Одвојте најмалку 10-15 минути дневно за разговор кој не е поврзан со бебето, како се чувствувате, што ве прави среќни или загрижени. Понекогаш е доволно само да ги споделите вашите размислувања, без да барате решение.
Физичка блискост
Физичката поврзаност не значи само сексуален однос. Допирите, прегратките, држењето за раце или нежниот бакнеж може да бидат моќен потсетник дека сè уште сте партнери, а не само родители. Често се случува физичката интимност да падне во втор план поради замор и преокупација, но токму овие мали гестови ја прават разликата.
Ако сексот во моментов е предизвик, поради исцрпеност, хормонални промени, состојбата на телото на жената по породувањето или психолошки притисок, фокусирајте се на нежноста која создава чувство на сигурност и припадност.
Планирајте време само за вас двајца
Иако можеби изгледа како луксуз, времето заедно без бебето е бесценето. Тоа може да биде прошетка додека некој друг чува деца, вечера дома со омилен филм или заеднички појадок додека детето спие. Важно е да се потсетите дека, покрај родителската улога, сепак имате своја љубовна приказна.
Ако имате поддршка од баби и дедовци, пријатели, не двоумете се да ја прифатите. Кратките моменти на освежување можат да направат чуда за вашата врска.
Поврзани објави
Покажете благодарност
Во родителството, чувството дека трудот и придонесот се препознаваат и ценат создава емоционална сигурност. Потсетете го вашиот партнер дека ја забележувате и ја цените неговата/нејзината улога, и како родител и како ваш придружник.
Бидете тим
Еден извор на конфликт меѓу младите родители е чувството на нееднаков товар. Отворено разговарајте за поделбата на обврските и заедно направете план кој е флексибилен и реален. Кога партнерите чувствуваат дека играат во ист тим, полесно е да се надминат секојдневните предизвици.
Не ги занемарувајте сопствените потреби
Врската е силна кога двајцата партнери се добро, физички, психички и емоционално. Не заборавајте за вашите сопствени хоби, интереси и пријатели. Грижата за себе не е себичност, туку предуслов за здрава врска. Кога ќе се чувствувате исполнето, полесно ќе се поврзете со партнерот.
Побарајте помош
Доколку сметате дека растојанието се зголемува и покрај напорот, разговорот со експерт може да биде корисен. Брачното советување не е знак на слабост, туку доказ дека се грижите за врската. Професионалецот може да ви помогне да ја зајакнете комуникацијата и да најдете стратегии кои се прилагодени на вашите потреби.
Прославете мали победи!
Направете ја вашата врска простор каде што се радувате на малите нешта. Првата насмевка на вашето бебе, заедно сварено кафе или успешна ноќ без плачење, сето тоа се моменти кои го зајакнуваат идентитетот на партнерот. Споделете ги овие моменти и запомнете дека сте во оваа авантура заедно.
Поврзувањето со партнерот по породувањето не е процес кој се случува спонтано, бара свесно внимание, труд и нежност. Наместо да се стремите кон совршенство, бидете еден за друг во несовршените моменти. Љубовта во родителството добива нова длабочина, а врската што ги преживува првите месеци со бебето често станува посилна од кога било.
Ако сакате вашата врска да расте заедно со вашето дете, не заборавајте да се грижите за двете лица кои пред се решиле да одат по овој пат, вие.
Фото: Pexels.com
