ЦУК попладнево информираше дека до 18 часот на територијата на државата се регистрирани вкупно 20 пожари на отворен простор. Од нив, осум се активни, два се ставени под контрола, а десет се целосно изгаснати.
Најголем број активни пожари има во различни делови од земјата, при што на повеќе локации гори ниска вегетација, грмушки и шумски површини.
Активни се пожарите во Моране – Вртекица – Рамни Габер во Општина Студеничани, каде е зафатена мешана шума, како и во подрачјата на Драгов Дол и Локвица во Македонски Брод, каде гори ниска вегетација, нискостеблеста шума и грмушки.
Пожари има и кај село С’лп во Велес, каде се зафатени ниска вегетација и ретка дабова шума, како и кај Копанце во Јегуновце, каде гори шума.
Активен пожар е регистриран и во Делогожда, Струга, а огнени линии има и на потегот Борино – Житоше во Крушево, каде се зафатени ниска вегетација и дабова шума.
Во Тополчани, Прилеп, пожарот зафатил стрниште и ниска вегетација, додека активен пожар има и во Мирковци, Чучер Сандево, каде гори ниска вегетација и ниви.
два пожари ставени под контрола
Според информациите на Центарот за управување со кризи, под контрола се пожарите во подрачјето Алданци – Норово во Крушево, каде е зафатена нискостеблеста деградирана дабова шума, и на градската депонија во Делчево.
десет пожари целосно изгаснати
Во текот на денот пожарникарите и останатите ангажирани служби успеале да изгаснат десет пожари.
Меѓу нив се пожарите кај Лознани и Вашарејца во Могила, Маково – Црничани – Брник во Новаци, Лопатица во Битола, Алинци во Прилеп, Ташмаруништа во Струга, Зајас во Кичево, Сушево во Штип, Новосељане во Куманово, Младо Нагоричане во Старо Нагоричане и пожарот на улицата „Иво Лола Рибар“ во Тетово.
Од ЦУК продолжуваат да ја следат состојбата на терен, особено поради високите температури и опасноста од повторно активирање на пожарите во сувите и шумски подрачја.
Граѓаните се повикуваат на максимална внимателност и да не преземаат активности на отворен простор кои можат да предизвикаат пожар.
