Резолуцијата усвоена од Федералната унија на европските националности, ФУЕН а поднесена од Македонско друштво “Илинден“-Тирана, доставена е до сите албански и меѓународни институции, а заради запознавање и до македонските.
Ова за МИА го потврди Никола Ѓурѓај, претседател на друштвото, додавајќи дека очекува албанските институции да преземат соодветни активности а посебно внимание да посветат и меѓународните институции.
Со Резолуција, од име на Македонско друштвото “Илинден“ и македонско национално малцинство во Република Албанија, меѓу другото, се бара од Владата на оваа земја, досегашното тело Комитетот за национални малцинства од консултативно тело на Владата да прерасне во Агенција за национални малцинства со посериозни и обврзувачки ингеренции за афирмација на националните малцинства во Република Албанија, рече Ѓурѓај.
Потсетува дека Комитетот за националните малцинства е формиран во 2004 година од страна на албанската Влада со задача да ја подобри заштитата на малцинствата во земјата, но додава, како што е утврдено во многу извештаи на меѓународни институции кои се занимаваат со правата на малцинствата, оваа институција е „подложна на политичко влијание, што резултира со негова целосна контрола од извршната власт и нејзина трансформација од тело за заштита на малцинствата, во тело штетно за дијалогот меѓу Владата и малцинствата“.
Затоа, сметаме дека Комитетот за националните малцинства треба да биде независен и активен глас на малцинствата, со способност да учествува во дијалог со Владата за заштита и подобрување на правата на малцинствата во Република Албанија, а неговата работа да биде јавна и присутна во медиумите во државата, нагласува тој.
Резолуцијата едногласно беше усвоена на 68-от Конгрес што се одржа во Хусум, Германија, кон крајот на минатиот месец, на кој учествува претставници од 105 организации-членки од 36 земји во Европа.
Post Views:
66
Извор : vesnik-ilinden.com
Ѓурѓај: Резолуцијата усвоена од ФУЕН, доставена до албанските и меѓународните институции
