Table of Contents
Дали ви се случува постојано да го одложувате учењето, работата или важните обврски, иако сте свесни дека времето тече? Ако одговорот е „да“, не сте сами. Станува збор за појава што има име – прокрастинација, а таа е многу почеста отколку што мислиме.
Што всушност значи прокрастинација?
Прокрастинацијата најчесто се опишува како застој или одложување на учењето и обврските, иако знаеме дека тие се важни и дека на крајот мора да се завршат. Често се поврзува со ученици и студенти, но во реалноста ги погодува сите – од вработени лица до креативци и родители.
Речиси сите се борат со прокрастинација – точно или неточно?
Точно.
Речиси секој човек во одреден период се соочува со прокрастинација. Причините за нејзината појава се различни:
-
замор и исцрпеност,
-
перфекционизам,
-
страв од неуспех,
-
превисоки очекувања,
-
па дури и страв од успех.
Иако најчесто се спомнува во контекст на учење, прокрастинацијата се однесува на сите форми на одложување на обврските, без разлика дали станува збор за работа, лични проекти или секојдневни задачи.
Одложуваме затоа што не сакаме нешто – точно или неточно?
Поврзани објави
Неточно.
Иако така изгледа на прв поглед, прокрастинацијата не мора да значи дека нешто не го сакаме. Напротив, често се јавува токму кај работи кои ни се многу важни. Перфекционизмот нè тера да чекаме „идеални услови“ за почеток, додека стравот од грешки или неуспех нè парализира и нè спречува да направиме прв чекор.
Дополнително, прокрастинацијата може да биде и знак на претеран замор, особено кога задачата е преобемна, премногу тешка или едноставно – здодевна.
Можеме ли сами да си помогнеме?
Точно.
Иако прокрастинацијата може да изгледа како непобедлив проблем, постојат практични начини со кои можеме да си помогнеме:
-
Поделете ја задачата на помали „порции“ – наместо да гледате во целата обврска, фокусирајте се на еден мал чекор.
-
Управувајте подобро со времето – кратки временски блокови често се поефикасни од долгите сесии.
-
Намалете го притисокот – заменете го „Морам да го направам ова“ со „Го сакам ова“ или „Ќе се обидам“.
-
Побарајте поддршка – споделете ја задачата со некого, работете во пар или тим, или едноставно разговарајте за тоа што ве блокира.
Прокрастинацијата не е мрзеливост
Важно е да се нагласи дека прокрастинацијата не е знак на мрзеливост, туку сигнал дека нешто во нас бара внимание – одмор, појасни цели или помал притисок. Препознавањето на причината е првиот чекор кон надминување на одложувањето и враќање на мотивацијата.
Текст: Марија Лукаревска
