„Штом си го пронајдеме своето место под сонцето, ништо повеќе не се чини толку тешко“

Table of Contents

„Никогаш доста од бината“, гласно вели Кали, затоа што нејзиниот немирен дух не ѝ дозволува да се откаже од тоа што го сака. Таа е ѕвезда што одамна силно блеска, но нејзините сјајни ноти допрва ќе оставаат траги на музичкото небо…

Нејзиниот глас надалеку одекна благодарение на музичкото талент-шоу The Voice, но таа отсекогаш самоуверено ја покорувала сцената со своите моќни изведби. Јутјуб-проектот Kaly’s Music Challenge ги обедини нашите музичари и ги претстави познатите хитови во ново, оригинално светло.

Калина Велковска – Кали е доказ дека соништата се остваруваат, доколку сме доволно истрајни, трпеливи и храбри за да посегнеме по нив. Не е лесно да се опстане како музичар на нашето поднебје, но за неа, ништо не е невозможно:

„Отсекогаш сум живеела шарено и динамично и често моите одлуки ме принудувале да излезам од удобната зона. Особено кога станува збор за избор на образование, професија и пасија. Откако собрав храброст и одлучив дека музиката ќе биде мојот единствен извор и определба, патот ми се осветли, а условите ми се подобрија. Накратко: ниеден успех не доаѓа прекуноќ, барем не оној со трајна вредност. За тоа е потребно време, трпение, жртва и работа. А штом си го пронајдеме своето место под сонцето, ништо повеќе не се чини толку тешко“, вели Кали.

Така и го започнува денот: свртена кон сонцето, со кафето во рака и полна чинија овошје – тоа е нејзината совршена комбинација за будење, а во последно време и аматерските хортикултурни активности ѝ помагаат да се успокои и да се фокусира. Себеси се смета за богат човек, затоа што е опкружена со убава енергија што инспирира:

„Имам убави луѓе околу мене кои носат своја приказна, и во моментите на емоционална нестабилност, тие се инспирација, мотив и поддршка за мојата насмевка. Животот е една прекрасна игра и треба да му се радуваме. Да не го земаме здраво за готово и да не забораваме дека по дождот секогаш доаѓа сонце.“

Колку повеќе созрева толку повеќе се отвора кон светот и не ѝ недостасува ништо:

„Навистина немам од што да се пожалам. Во основа сум немирен дух, веројатно затоа и се занимавам со сценска уметност, со нешто што може да го култивира и соодветно да го скроти мојот темперамент. Како и секој приврзаник на бината – никогаш доста од бината. Што и да ми се случува, знам дека сакам да сум на неа што е можно подолго и таа да ме однесе што е можно подалеку, а деталите околу овие желби сами се кристализираат со текот на времето“.

И ние го посакуваме истото за Кали, бидејќи нејзините ѕвездени ноти допрва ќе го ткаат музичкото небо, а нејзината приказна нека ни послужи како потсетник дека никогаш не треба да забораваме која е нашата пасија и што ни дава смисла во животот.

Поврзани објави

КАЛИ НЕ МОЖЕ БЕЗ…