Американскиот претседател Доналд Трамп има намера утре да се состане во Белата куќа со четворицата клучни претставници на Конгресот, еден ден пред истекот на рокот за постигнување спогодба за финансирање на федералната влада.
Тој ќе разговара со спикерот на Претставничкиот дом, Мајк Џонсон, и лидерот на мнозинството во Сенатот, Џон Тун, како и со лидерот на демократите во Претставничкиот дом, Хаким Џефрис, и лидерот на малцинството во Сенатот, Чак Шумер.
Демократите, предводени од оние во Сенатот, одбија да гласаат за донесување на мерка за финансирање, која ќе овозможи на федералната влада и нејзините релевантни агенции да продолжат со работа. Во спротивно, на полноќ во среда ќе дојде до моментален прекин на нивната работа.
Агенциите пренесуваат дека демократите сметаат дека имаат преговарачка моќ и бараат важни здравствени прописи во замена за нивната поддршка. Тие сакаат да ги зголемат субвенциите кои им помагаат на лицата со ниски и средни приходи да имаат здравствено осигурување според Законот за достапна заштита.
Демократите, исто така, се залагаат за отстранување на намалувањата во програмата Медикејд, кои беа вклучени во основниот буџет предложен од републиканците.
Републиканците изјавуваат дека овие барања се „неприфатливи“ и се подготвени да разговараат за нив со демократите независно од преговорите за финансирање на владата. Републиканската партија бара продолжување на сегашното финансирање за период од седум недели.
