По завршувањето на реновирањето на Розовата градина и поставувањето златни ливчиња во Овалната соба, американскиот претседател Доналд Трамп ќе се посвети на неговиот досега најзначаен проект во Белата куќа – нова балска сала во вредност од 200 милиони долари, која ќе биде доградена до Источното крило на резиденцијата.
Трамп, поранешен градежен претприемач со афинитети кон уредувањето, одамна изрази незадоволство дека на Белата куќа ѝ недостига пространа балска сала за организирање свечености.
Белата куќа вчера ги претстави плановите за започнување на градежните работи во септември, за она што би можело да претставува најголемо реновирање откако екс-претседателот Хари Труман го доврши неговиот темелен ремонт во 1952 година.
Белата куќа е подигната во 1800 година, а делумно е реконструирана откако дел од неа беше запален од страна на британските војници за време на војната од 1812 година.
Портпаролката на Белата куќа, Керолин Левит, изјави пред новинарите дека изградбата на државната балска сала од 90,000 квадратни метри (8,360 метри квадратни) ќе биде завршена „многу пред“ истекот на четиригодишниот мандат на Трамп во јануари 2029 година.
Таа додаде дека трошоците од 200 милиони долари за балската сала, во која ќе може да се сместат приближно 650 лица, ќе бидат покриени од самиот Трамп и други донатори. мс/фото: ЕПА архива. Извор: МИА
