Техниката му е перфектна, но најважно е тоа што многу го сака спортот! – Убавина и здравје

Запознајте ја новата надеж во светот на тенисот!

Тенисот е еден од најпопуларните спортови во светот, со богата историја и долга традиција. Од оние што се обиделе да станат професионални тенисери, само најупорните и најпосветените успеале да постигнат значајни резултати. Како и за секој друг спорт, добро е да се почне со тренинзи што е можно порано, а како што ни открива инструкторката по тенис Симона Ангелова, најважно е детето да го сака спортот. Во продолжение дознајте од која возраст децата кај нас почнуваат да тренираат тенис, но и колку се талентирани за овој извонреден спорт.

Колку време работиш како инструкторка по тенис?

Играм тенис од моите 7 години, се занимавав професионално до 18 години, но потоа, за жал, се откажав. Почнав паралелно да одам на турнири и да работам како тренер по тенис на 15-годишна возраст. Моментално работам со мали деца до 10 години и со возрасни почетници.

Колкав е интересот кај децата за овој спорт и од која возраст обично почнуваат да тренираат?

Голем е интересот за тенис, особено во летниот период кога има професионални турнири на терените во тенискиот клуб „Југ“ и многу нови дечиња почнуваат да играат тенис, а потоа го засакуваат спортот и продолжуваат да тренираат и понатаму. Јас, тренерот Боби и тренерката Нерис имаме 5 групи, од кои 4 групи играат „портокалов“ тенис (во тие групи има максимум 6-7 деца), а едната е „црвена“ група (почетна група со најмалите членови, каде што имаме 15 дечиња). Најрано што може едно дете да почне со тренинзи е 4 години, но најчесто почнуваат на 5-6 години. Најмладите членови кај нас имаат 4 години како Ерин, Каја и Јована.

Како изгледа еден ваш вообичаен тренинг?

Го почнуваме тренингот со загревање (трчање, вежби за моторика и координација), тоа трае 7-8 минути. Потоа, ги делиме децата во 3 групи. Секој тренер е задолжен за максимум 5 деца, за да можеме максимално да им се посветиме, па правиме 3 смени за да може секоја група да игра со секој тренер. На крај, им даваме забавна игра, бидејќи, сепак, работиме со мали дечиња од 4 до 7 години, кои треба да го засакаат спортот и да се забавуваат.

Колку се талентирани нашите деца за играње тенис?

Има многу талентирани деца кај нас, но талентот не е тоа што ги издвојува од другите. Најмногу се издвојуваат децата што го сакаат спортот, односно не се принудени да тренираат од дома, децата кои се дисциплинирани и сакаат да научат и да успеат.

Ерин е едно од децата што покажуваат неверојатен талент за тенис, иако има само 4 години. Каква кариера му предвидувате на Ерин?

Ерин се издвојува од другите деца од самиот почеток. Тој од старт можеше да се снајде околу фаќањето и контролирањето на топчето, додека на 4-годишните деца обично им е тешко и самото трчање и „ловење“ на топчето. Ерин одлично се снајде со сите „основни” фази. Сега тој може без проблем да игра во размена со нас, а техниката за форхенд и бекхенд му е перфектна. Најважно од сè е тоа што Ерин на секој тренинг доаѓа 20 минути порано и едвај чека да почнеме, а притоа му е максимално посветен на тренингот, што не е вообичаено кај дете од 4 години. За во иднина, сè уште е рано да се каже, но мислам дека Ерин ќе стане успешен тенисер ако продолжи да ги негува љубовта и желбата за спортот.

Што е потребно да направат децата како Ерин за да продолжат да напредуваат во овој спорт? Што би ги советувала нивните родители?

За да се напредува во тенисот, потребни се многу тренинзи и финансии, но до одредена граница, бидејќи не треба многу да се форсираат децата на оваа возраст. Исто, добро е да се оди на сите турнири во Македонија, да се стекнува искуство и знаење. Родителите би ги советувала да ги остават децата прво да се забавуваат и да го засакаат спортот, наместо да ги форсираат. Многу родители имаат неостварена желба да бидат успешни тенисери, па таа желба се обидуваат да ја остварат преку своите деца.