Зендаја повторно беше меѓу највпечатливите дами на црвениот тепих на доделувањето на наградите Еми. Актерката блескаше во спектакуларна проѕирна креација на Prada, специјално изработена за неа, украсена со бројни кристали и мониста, а гламурозниот изглед го надополни со раскошен накит од Mikimoto.
На свеченоста таа пристигна во друштво на својот партнер Том Холанд, со кого е во врска од 2021 година. Но, покрај нивната појава, особено внимание повторно привлече мистеријата околу нивниот наводен таен брак.
Стилистот Лоу Роуч, кој пред неколку месеци тврдеше дека Зендаја и Том Холанд веќе стапиле во брак, сега даде сосема поинаква изјава. Тој призна дека тогаш „лажел“ и откри дека официјалната свадбена церемонија допрва треба да се одржи.
„Тие сè уште немале официјална церемонија. Тоа ќе се случи по прес-турнејата за ‘Dune’“, изјавил Роуч, додавајќи дека Зендаја „веќе долго време е негова сопруга“, но дека бракот сè уште не е официјализиран.
Сепак, неговите зборови дополнително ја разгореа мистеријата, особено по изјавите на самиот Том Холанд. Актерот во неколку наврати ја нарекуваше Зендаја „моја сопруга“, а во јуни, во интервју за Esquire, даде можеби најсилна навестување дека свадбата навистина се случила.
Зборувајќи за фотографии генерирани со вештачка интелигенција, кои наводно го прикажувале нивниот свадбен ден, Холанд рече дека неговите блиски не биле измамени од лажните фотографии бидејќи „сите биле таму“ на вистинската свадба.
Тој не откри кога и каде се случила церемонијата, туку само кратко додаде: „Тоа е сè што ќе добиете за тоа“.
Зендаја и Том ја потврдија својата врска во ноември 2021 година, а се верија во декември 2024 година. Оттогаш, секој нивен чекор повторно го разгорува интересот за тоа дали познатиот пар навистина тајно се венчал или големата церемонија допрва следува.
