Новата цена за купување на младиот компир во струмичкиот регион ќе се покачи од 30 на 35 денари по килограм. Ова беше објавено по денешната средба помеѓу министерот за земјоделство, шумарство и водостопанство, Цветан Трипуновски, и претставници на откупувачите од струмичкиот крај, која се одржа во Општина Босилово.
Според зборовите на откупувачите, со повисоката набавна цена, земјоделците што одгледуваат компир би требало да бидат задоволни.
“Во наредните седум до десет денови ќе го откупуваме компирот по договорената цена и да ги навикнеме купувачите да ја пазарат цената од 35 денари и сметам, иако е почеток на бербата, да остане оваа цена на задоволство на производителите и на откупувачите,” изјави Доне Јанев, откупувач од компанијата „Трофеј 08“, кој додаде дека овогодишната жетва е намалена за 30 до 40 отсто во споредба со минатата година.
Министерот Трипуновски изрази уверување дека исходот од денешната средба е на обострано задоволство.
“Сакам да потенцирам дека продолжуваме да се грижиме и да го цениме трудот на македонскиот земјоделец да работи со профит и рентабилно, зашто само така можеме да ја вратиме довербата кон институциите и да го зголемуваме земјоделското производство.”
Тој информираше дека веќе е поставена на ЕНЕР законската рамка за земјоделство и рурален развој, за која во текот на следните триесет дена ќе можат да се достават коментари, а во која е предвидено и регулирање на пазарите, односно пласманот на земјоделски производи. По завршувањето на јавната дебата, законот ќе биде предаден во владина и собраниска процедура, објасни Трипуновски.
На прашање од новинарите за тоа како тече откупот и пласманот на зелката, министерот одговори дека во изминатите месеци е посветено големо внимание на ова прашање и дека е дискутирано со откупувачите и земјоделците за пласманот на зелката.
“Постигнавме одличен резултат затоа што сите заеднички покажавме дека кога ќе се постигне договор и истиот ќе се почитува тогаш македонскиот земјоделец добива цена каква што доликува.”
Трипуновски додаде: “Досега е познато дека она што ќе значи девизен прилив од зелката во овој регион се движи над 32 милиони евра и тоа во минатото се нема случено.”
Тој нагласи дека според податоците од Државниот завод за статистика за првиот квартал од минатата и од оваа година, има значаен пораст во откупот и пласманот на земјоделските производи. Конкретно, во градинарскиот сектор, зголемувањето достигнува до 50 отсто во споредба со минатата година, што според него укажува дека Владата и Министерството се движат во вистинска насока кон зголемување на производството и девизниот прилив од пласманот на производството.
