Table of Contents
Мек бисквит, богата чоколадна глазура и кокосова обвивка – комбинација што ги враќа најубавите спомени од домашната кујна.
Чупавците се еден од оние колачи што со години не ја губат својата популарност. Меките коцки бисквит потопени во чоколадна глазура и валкани во кокос се едноставни за подготовка, а изгледаат и вкусно и привлечно на секоја трпеза.
Интересно е што овој десерт е познат и во Австралија, каде што се нарекува „ламингтон“ (Lamington) и се смета за традиционален национален десерт. Името го добил по лордот Ламингтон, поранешен гувернер на Квинсленд.
Состојки
За бисквитот
- 130 г омекнат путер
- 200 г шеќер во прав
- 3 јајца
- 220 г остро брашно
- 1 лажичка прашок за печиво
- 120 мл млеко
За глазурата
- 300 г шеќер во прав
- 30 г какао
- 15 г путер
- 120 мл зовриена вода
- 180 г кокос за валкање
Подготовка
1. Подгответе го бисквитот
Загрејте ја рерната на 180 °C. Намастете плех со димензии 20 × 30 см и обложете го со хартија за печење, оставајќи малку хартија да излегува од страните за полесно да го извадите бисквитот.
2. Изматете ги состојките
Со миксер изматете ги путерот и шеќерот додека не добиете светла и кремаста смеса. Додавајте ги јајцата едно по едно, мешајќи по секое додавање.
Поврзани објави
Во посебен сад измешајте ги брашното и прашокот за печиво. Во смесата со путерот постепено додавајте половина од брашното, потоа половина од млекото. Повторете со преостанатите состојки и мешајте додека смесата не се изедначи.
3. Испечете го бисквитот
Истурете ја смесата во подготвениот плех и израмнете ја површината. Печете околу 30 минути на 180 °C. Проверете со чепкалка – ако излезе сува од средината на бисквитот, тој е готов.
Оставете го во плехот околу 10 минути, а потоа извадете го, покријте го со чиста кујнска крпа и оставете го да отстои преку ноќ. Така полесно ќе се сече и ќе ја задржи формата при потопувањето во глазурата.
4. Подгответе ја чоколадната глазура
Следниот ден, во сад просејте ги шеќерот во прав и какаото. Додајте ги путерот и зовриената вода, па мешајте додека не добиете мазна смеса без грутчиња.
5. Исечете и извалкајте ги чупавците
Исечете го бисквитот на 15 еднакви коцки. Во плитка чинија ставете го кокосот. Секоја коцка набодете ја со вилушка, потопете ја во чоколадната глазура и оставете го вишокот да се исцеди. Потоа извалкајте ја во кокос од сите страни.
Наредете ги готовите чупавци на решетка и оставете ги најмалку два часа, за глазурата да се стегне.
Совет: За најдобар резултат, не го прескокнувајте одморањето на бисквитот преку ноќ. Добро изладената подлога полесно се сече и помалку се рони при потопувањето.
Screenshot youtube
