Земјата во петок, 9 октомври, може да биде погодена од умерена геомагнетна бура од категорија G2, откако од Сонцето кон нашата планета се упатил облак од наелектризирани честички.
Предупредувањето го издаде американскиот Центар за предвидување на вселенското време при NOAA, а причината е коронално исфрлање на маса – познато како CME, кое по сончевата ерупција се движи во правец на Земјата.
Сателитските набљудувања покажале дека станува збор за таканаречен „halo CME“, односно исфрлање чиј материјал се шири околу Сонцето во форма што укажува на движење кон нашата планета.
Според прогнозите, облакот од сончева плазма треба да пристигне во близина на Земјата во текот на петокот. Кога ваквиот материјал ќе стапи во интеракција со магнетното поле на Земјата, може да предизвика нарушувања познати како геомагнетна бура.
МОЖНИ ТЕХНИЧКИ НАРУШУВАЊА
На скалата на NOAA, геомагнетните бури се категоризираат од G1 до G5, при што G1 претставува најслаба, а G5 екстремна бура.
Категоријата G2 се смета за умерена, но може да предизвика одредени технички ефекти, особено во областите поблиску до половите.
Во одредени услови може да дојде до зголемени струи во електроенергетските системи и до одредени нарушувања во работата на мрежите. Можно е и зголемено атмосферско сопирање на сателитите во ниска орбита, што може да бара корекции на нивните траектории.
Геомагнетната активност може да влијае и врз радиокомуникациите и навигациските системи. Најизразени ефекти се очекуваат на повисоките географски широчини, каде што нарушувањата на сигналите можат да бидат почести.
За луѓето на Земјата, ваква бура не претставува директна здравствена опасност. Атмосферата и магнетосферата обезбедуваат заштита од најголемиот дел од штетното сончево зрачење и наелектризираните честички.
МОЖЕ ЛИ ДА СЕ ВИДИ ПОЛАРНА СВЕТЛИНА?
Еден од најатрактивните ефекти на геомагнетните бури е појавата на поларна светлина, која при засилена сончева активност може да се појави и многу подалеку од поларните региони.
Во случајот со најавената бура G2, најголеми шанси за набљудување на аурора имаат жителите на северните делови од Европа и Северна Америка.
За поларната светлина да биде видлива од Балканот, потребна е значително посилна геомагнетна активност. Сепак, интензитетот на бурите може да варира откако сончевиот материјал ќе пристигне во близина на Земјата.
Особено значајна е ориентацијата на магнетното поле на пристигнатиот облак. Доколку условите овозможат посилна интеракција со магнетосферата на Земјата, геомагнетната активност може привремено да се засили.
Затоа, научниците ќе го следат развојот на состојбата во текот на петокот, кога ќе биде појасно колку силно сончевиот облак ќе влијае врз магнетното поле на нашата планета.
