28 ноември 2024, Скопјани утрово го дишат најзагадениот воздух во Европа, според податоците на специјализираната страница за мерење на квалитетот на воздухот IQAir. Индексот на загадување изнесува 161, а воздухот е означен како нездрав.Високите вредности на загадувањето, според експертите, имаат сериозен ефект на здравјето на граѓаните, особено во зимските месеци кога се зголемува употребата на горива и поради затоплувањето на домовите.
Препораките на надлежните се да се избегнува подолг престој на отворено, а до граѓаните се апелира повеќе да се потпираат на јавниот превоз и да ги остават автомобилите во своите домови. Засега не се изречени мерки за ослободување од работа на граѓаните кои спаѓаат во ранливите категории кога е во прашање здравствената состојба иако со денови воздухот во Скопје бележи високи нивоа на загаденост.
