Министерот за надворешни работи на Унгарија, Петер Сијарто, денес соопшти дека Унгарија нема да партиципира во финансирањето на американско вооружување за Украина, во случај САД официјално да се обратат до Европската Унија со ваква иницијатива.
“Би сакал да нагласам дека унгарските пари, унгарското оружје и унгарските војници нема да бидат испратени во Украина. Ништо нема да биде испратено таму”, рече Сијарто на прес-конференцијата во Будимпешта, заедно со мароканскиот министер за трговија, Ријад Мезур.
Осврнувајќи се на испораките на американско оружје за Украина, Сијарто потенцираше дека американскиот претседател Доналд Трамп најмногу придонел за мир. “Неговите мировни напори можеа да бидат многу поуспешни во последните месеци доколку не беа попречени од европските и украинските лидери. Се надевам дека Доналд Трамп нема да се откаже од своите мировни напори. Во овој поглед, охрабрувачки е што моите американски и руски колеги (Сергеј Лавров и Марко Рубио) разговараа речиси еден час минатата недела, што е добар знак“, изјави Сијарто, надевајќи се дека мировните напори ќе продолжат, бидејќи, како што рече, “во наш интерес е да имаме мир”.
Тој исто така нагласи дека владата на Унгарија ќе настојува да се донесе заеднички став на Европската Унија во врска со присилното регрутирање во Украина, каде што неодамна беше смртно претепан Унгарец.
Сијарто изрази дека е “шокантно” што меѓународната политичка заедница ги затвора очите пред бруталните и насилни судири во Украина, додека, како што рече, “кога се случуваат десетина вакви инциденти на друго место, Европската Унија брза да ги осуди таквите дела. Во Украина често се случуваат потери по луѓе. Ги гледаме видеата. Никој не ја негирал автентичноста и веродостојноста на овие видеа, бидејќи не можеле. Луѓе без обука, во многу случаи целосно неспособни и неспособни за служба на фронтот, се киднапирани пред нивните семејства и мали деца и се принудени да служат на фронтот”, изјави Сијарто.
Тој посочи дека “луѓето се брутално претепани до смрт” бидејќи не сакаат да учествуваат во војна. “Ова е неприфатливо. И ова се случува тука во срцето на Европа, а европските политичари се преправаат дека ова не се случува”, рече Сијарто, најавувајќи дека ќе го постави ова прашање на состанокот на Советот за надворешни работи на ЕУ во Брисел. Тој додаде дека ќе го повика Брисел да заземе став за тоа дали смета дека “насилното, брутално присилно регрутирање што се случува во Украина” е прифатливо. “Мислам дека она што се случува во Украина во овој поглед не е само спротивно на човековите права и меѓународното право, туку и спротивно на основните човечки норми”, заклучи унгарскиот министер за надворешни работи.
Воедно, тој потенцираше дека Брисел направил грешки во доменот на економската политика, кои, според него, ја направиле Европската Унија “сè повеќе изолирана” од глобалната економија.
мс/фото: ЕПА .
Извор: МИА
