Скот Иствуд, синот на холивудската легенда Клинт Иствуд, проговори за трагичната загуба на својата девојка Џуел Брангман, која го загубила животот во сообраќајна несреќа пред повеќе од десет години
Холивудскиот актер првпат отворено зборуваше за болката што и денес ја чувствува по смртта на Џуел Брангман. Тој откри дека таа загинала во сообраќајна несреќа во 2014 година, а според него, трагедијата била предизвикана од неисправно воздушно перниче, кое наместо да ја заштити, ѝ нанело смртоносни повреди.
Во неодамнешното гостување во подкастот „Armchair Expert“, Иствуд се присети на трагичниот настан, објаснувајќи дека станувало збор за судир што во нормални околности најверојатно би можел да се преживее.
„Бевме заедно три или четири години. Во тоа време имаше повлекување на одредени воздушни перничиња поради фабрички дефект, а несреќата што веројатно повеќето луѓе би ја преживеале, за неа заврши фатално. Практично ја погоди воздушното перниче“, раскажа актерот.
Во моментот на несреќата, Скот бил на снимање филм на друг крај од светот, поради што не можел веднаш да се врати дома.
„Во тоа време бев на друг филмски сет. Кога сте на снимање и ќе дознаете дека некој починал или се случило нешто страшно, навистина е многу тешко“, изјави тој.
Четириесетгодишниот актер откри дека тоа не бил првиот пат да загуби блиска личност додека работел.
„Тоа ми се има случено и претходно. Го изгубив и Пол Вокер додека го снимав филмот Fury. Тој беше еден од моите најблиски пријатели. Кога сте на филмски сет, немате време да тагувате, затоа што снимањето мора да продолжи.“
Иствуд, кој е син на Клинт Иствуд и Џејслин Ривс, објасни дека обврските околу снимањето не му оставиле простор да замине.
„Не можете едноставно да се качите во авион и да си заминете. Заглавени сте бидејќи мора да работите.“
Поврзани објави
Наместо да се соочи со болката, признава дека тогаш ги потиснал емоциите.
„Повикот го добив среде снимање и мислам дека несвесно го активирав класичниот одбранбен механизам – ‘остави го тоа за подоцна’. Ми беше ужасно да се справувам со сето тоа, а во исто време да немам можност навистина да ја проживеам тагата“, рече тој.
Денес смета дека тоа не било најздравиот начин да се справи со загубата.
„Тагував подоцна. А мислам дека тоа не е добро. Важно е да тагувате заедно со луѓето кои исто така ја сакале таа личност. Тоа е значаен дел од процесот на справување со загубата.“
Иствуд и претходно јавно има зборувано за смртта на Џуел Брангман, во интервју за магазинот GQ Australia во 2016 година.
„Пред неколку години бев во врска со девојка која загина во сообраќајна несреќа. Виновникот беше воздушно перниче што беше повлечено од употреба. Перничето експлодирало, а метален фрагмент поминал низ нејзиното тело. Ѝ го скршил ‘рбетот… Никогаш претходно не сум го кажал ова“, призна тогаш актерот.
Тој додаде дека и претходно губел пријатели, но оваа загуба била поинаква.
„И претходно сум губел пријатели, некои навистина прекрасни луѓе. Но никогаш не сум изгубил личност со која сум бил толку близок, во љубовна врска.“
Според него, трагедијата оставила длабоки последици и врз неговиот љубовен живот.
„Мислам дека тоа навистина ме промени… Не знам. Можеби ми го отежна отворањето кон нови врски“, искрено призна Скот Иствуд.
ФОТО: ИНСТАГРАМ
