Будењето среде ноќ е проблем со кој се соочуваат многу луѓе. Понекогаш станува збор за кратко прекинување на сонот по кое лесно повторно заспиваме, но кај некои луѓе будењето е проследено со часови превртување во креветот и неможност повторно да потонат во сон.
Според специјалистите за спиење, повременото будење во текот на ноќта не мора да биде причина за загриженост. Сепак, ако се повторува често и влијае врз енергијата и концентрацијата во текот на денот, важно е да се откријат можните причини.
Една од најчестите грешки е обидот насила да се заспие. Колку повеќе се грижиме за тоа колку време ни останува до утринското будење, толку поголема може да стане напнатоста. Затоа, експертите советуваат да не го проверувате постојано часовникот и да не се оптоварувате со пресметување колку сон ви преостанува.
Ако не можете повторно да заспиете по околу 20 минути, подобро е да станете од креветот и да направите нешто смирувачко во просторија со пригушено светло. Можете да прочитате неколку страници од книга или да слушате тивка музика. Вратете се во кревет кога повторно ќе почувствувате поспаност.
Важна улога има и изложеноста на светлина. Избегнувајте да го земате телефонот веднаш по будењето, бидејќи светлината од екранот и содржините што ги следите можат дополнително да ве расонат.
Специјалистите препорачуваат и одржување редовен распоред на спиење, односно легнување и будење во приближно исто време секој ден. Просторијата во која спиете треба да биде тивка, затемнета и со пријатна температура.
На квалитетот на сонот влијаат и навиките во текот на денот. Кофеинот во попладневните и вечерните часови, алкохолот, обилните оброци пред легнување и недостигот на физичка активност можат да придонесат за почести ноќни будења.
Ако будењето среде ноќ станало редовна појава, проследено со дневен замор, раздразливост или проблеми со концентрацијата, препорачливо е да побарате совет од лекар. Причината понекогаш може да биде несоница, стрес, анксиозност, апнеја при спиење или друго здравствено нарушување.
Најважно е да не ја претворате ноќната пауза во дополнителен извор на стрес. Мирната рутина и редовните навики можат да помогнат повторно да воспоставите поквалитетен сон.
