Соединетите Американски Држави соопштија дека одобруваат кредитна гаранција во вредност од 4 милијарди американски долари за Полска, наменета за набавка на американска воена опрема. Оваа одлука е донесена во склоп на напорите за зајакнување на полската одбрана и поради воените дејствија во Украина.
“Полска останува еден од најцврстите и најсигурните сојузници на САД во Европа, земја на фронт линијата на источното крило на НАТО и лидер во инвестициите во одбраната”, изјави портпаролката на американскиот Стејт департмент, Тами Брус.
Варшава веќе неколку години ја обновува својата војска преку низа договори за вооружување, претежно со САД и Јужна Кореја.
Оваа година, Полска веќе има одвоено 4,7% од својот бруто домашен производ за воени трошоци и планира дополнително да го зголеми овој процент следната година.
Полска има купено најсовремена американска опрема за вооружување, како што се хеликоптерите “Апачи”, ракетните системи “Химарс” и противвоздушните системи “Патриот”.
