Цените за полнење електрични автомобили на дел од јавните полначи во Северна Македонија би можеле да бидат предмет на нови правила, откако Регулаторната комисија за енергетика и водни услуги најави воспоставување регулаторна рамка за операторите и нивните услуги.
Претседателот на РКЕ, Ацо Ристов, во емисијата „Ноќно студио“ на 4ТВ изјави дека до регулаторот стигнале информации за значително повисоки цени на одредени полначи. Според него, во некои случаи цената достигнувала околу 700 евра за мегават-час, објави 4news.mk.
Ристов оцени дека прашањето треба да се уреди со јасни правила, особено поради ограничениот избор што го имаат возачите на електрични автомобили кога патуваат по автопатите.
Планирано е да се воспостави постапка преку која ќе се определуваат операторите на инфраструктурата за полнење. Компаниите што ќе сакаат да управуваат со полначите ќе треба да исполнат однапред утврдени услови.
За постојните полначи би можел да биде предвиден преоден период. Во тој период сегашните оператори би имале можност да се усогласат со новите правила или да го уредат своето работење преку договори со оператори кои ќе ги исполнуваат новите услови.
Едно од прашањата што РКЕ го разгледува е и раздвојувањето на различните улоги во системот. Според Ристов, треба да се избегне ситуација во која дистрибутерот на електрична енергија истовремено би имал и улога на оператор на мрежата за полнење.
Со воведувањето на регулаторна рамка, целта е да се утврдат услови за функционирање на инфраструктурата за полнење, како и појасни правила за корисниците и компаниите што ги нудат услугите.
