Испробајте го ова вкусно рижото по рецепт на Ивана Темелкоска (madmona7)
Ова кремаво рижото со тиква и карамелизиран путер од лешници и крцкава жалфија е совршено за релаксирачка вечера за двајца. Испробајте го овој рецепт на Ивана Темелкоска (@madmona7) и уживајте во неговиот неодолив вкус.
Состојки:
- 150 г ориз арборио или друг бел ориз со кратко зрно
- 1 мала главица кромид (ситно исечкана)
- 1 лажица путер
- 2 лажици маслиново масло
- 500 мл зеленчукова супа (топла)
- 200 г печена тиква (испечена и испасирана)
- 100 мл бело вино
- 1/4 лажиче мелено морско оревче
- 50 г пармезан (рендан)
За преливот:
- 2 лажици путер
- 30 г лешници (крупно искршени)
- неколку ливчиња жалфија
Поврзани објави
Приготвување:
1. Во голема тава загрејте го путерот на средна температура и додајте го ситно сечканиот кромид. Пржете го кромидот додека омекне и стане проѕирен, околу 5 минути. Додајте го оризот арборио во тавата и пржете го заедно со кромидот 2-3 минути, додека оризот впие дел од путерот. Сипете го белото вино и мешајте додека испари алкохолот, околу 2 минути.
2. Почнете постепено да ја додавате зеленчуковата супа, лажица по лажица, постојано мешајќи. Почекајте оризот да ја впие течноста пред да додадете нова лажица супа. Продолжете така додека оризот биде кремлив и целосно сварен, 18-20 минути.
3. Кога оризот ќе биде речиси готов, додајте ги испасираната печена тиква и морското оревче. Добро промешајте и почекајте неколку минути да се соединат вкусовите.
4. Тргнете го рижотото од оган и измешајте го со пармезанот. Покријте ја тавата и оставете да отстои 2 минути.
5. За преливот, во мала тава растопете го путерот на средна температура и гответе го додека почне да заруменува. Додајте ги ливчињата жалфија и пржете ги додека се свиткаат и станат крцкави, па извадете ги и тргнете ги на страна. Додајте ги лешниците и пржете ги кратко, додека станат крцкави.
6. Послужете го рижотото топло и сервирајте го со една лажица од карамелизираниот путер, лешниците и пржената жалфија. На здравје!
ФОТО: ПРИВАТНА АРХИВА
