Фото: Централниот совет на Македонците во Германија
Денес во просториите на Општината се одржа официјална работна средба помеѓу градоначалникот на општина Кичево, д-р Александар Јовановски, и Кленкоски претседател на Централниот совет на Македонците во Германија.
Средбата помина во исклучително конструктивна атмосфера, фокусирана на воспоставување долгорочно партнерство. Главната цел на соработката е Централниот совет да дејствува како официјален мост и промотор на Општина Кичево во Германија, со цел привлекување на германски инвеститори и бизнис-кругови од дијаспората преку организирана промоција на економските потенцијали на градот.
Економски столбови и геостратешки предности
Како основа за идните промотивни и маркетинг активности на Централниот совет во Германија, градоначалникот д-р Јовановски ги претстави клучните економски столбови на Општината. Во таа насока, посебно беше нагласена геостратешката и логистичка позиција на Кичево како природен крстопат помеѓу Прилеп, Гостивар и Охрид, што нуди извонредни логистички предности за брз пристап до целиот регион и соседните балкански пазари.
Како примарна цел за ревитализација беа посочени традиционалните индустриски сектори за преработка на железо и глина, кои располагаат со веќе постоечка база и инфраструктура. Општината упати недвосмислена гаранција дека за сите германски и иселенички инвеститори кои ќе покажат интерес за рестартирање на овие капацитети, локалната самоуправа ќе обезбеди оптимални услови, брзи административни патишта и максимална институционална поддршка, со целосно елиминирање на бирократските кочници од минатото.
Меѓународно поврзување и збратимување градови
Како клучен чекор кон меѓународно поврзување, градоначалникот Јовановски изрази силна желба Општината, во директна соработка и под покровителство на Централниот совет, да иницира процедура за официјално збратимување на Кичево со соодветен еквивалентен град од СР Германија. Овој процес ќе отвори нови перспективи за економска, социјална и образовна размена на високо институционално ниво.
Оптимизација на администрацијата и промоција на туризмот
Дополнително, презентираниот ЕУ-модел за „One-Stop-Shop“ канцеларии за брзи услуги наиде на силно одобрување од страна на градоначалникот. Тој потенцираше дека оптимизацијата на администрацијата е неопходна за иселениците и туристите да можат своето време во Кичевијата да го посветат на уживање во постоечките природни и културни ресурси (како планината Бистра, изворите во Белица и манастирот „Св. Богородица Пречиста“), наместо во долготрајни административни процедури.
Позитивен заклучок на Централниот совет
Г-дин Кленкоски, во име на Централниот совет во Германија на изрази висока почит за професионалниот пристап, срдечноста и визионерскиот дух покажан од страна на д-р Јовановски. Овој партнерски и отворен модел на дијалог целосно кореспондира со позитивните практики кои организацијата претходно ги евидентираше во Општина Гостивар.
Кичево се менува: Новиот градоначалник отворен за соработка!
Post Views: 159
Извор : vesnik-ilinden.com
